Inatsisartut nalunaaquttap allanngortinneqarnissaa qangali eqqartortareerpaat.

Inatsisartunili marlunngormat oqallittoqarmat, naalakkersuisooqatigiit pingasut aasaanerani nalunaaquttap allanngortinneqartarnerata atorunnaarsinneqarnissaa ataavartussamillu akunnermik ataatsimik kinguartinneqarnissaa ammaffigalugu oqaatigaat.  

Kisianni tamanna aningaasatigut kingunerisinnaasai pillugit akerliunertik aamma oqaatigaat.

- Allannguutit soorunami akeqassapput. Kisianni aningaasaliissutit inuiaqatigiinnut allatigut iluaqutaasinnaagaluartut atorneqartariaqassapput, Jens-Frederik Nielsen (D) oqaluttarfimmiit oqarpoq, aningaasartuutaasussallu assigiinngitsut eqqartorlugit:

- Atuisut sulisartullu, tamatta, atugassarititaasut ajornerulernerat maluginngitsuussanngilarput.

Oqallinneq pillugu ataani allaaserisaq atuarneqarsinnaavoq mannissartoqarsinnaaneranullu periarfissanut aamma tunngajumaarpoq. Atuarluarisi.  

Nalunaaquttap ingerlaqatigiiffia nutaaq

Nunarput nalunaaquttap ingerlaqatigiiffianit UTC -3-mit UTC -2-mut 2023-mi tikisitsivoq, nalunaaqutaq taamaalilluni akunnermik ataatsimut kinguartinneqarluni.

Nalunaaqutarli nalunaaquttap ingerlaqatigiiffitoqaanut utertinneqarnissaa Siumup Naleqqallu kissaatigaat. Aasaaneranilu nalunaaqutaq atorunnaarsinniarneqarluni.

Taakku siunnersuutaat ataatsimiititaliamit suliarineqareerluni marlunngornermi oqallinnermi aappassaanneerneqarpoq.

- Nalunaaqutaq allanngortikkatsigu naalagaaffiup karsi aningaasannannerunngilaq, Pele Broberg oqaluttarfimmit marlunngornermi oqarpoq, aasaaneranilu nalunaaqutaq aamma isornartorsiorlugu:

- Timmisartuutileqatigiiffiit danskit periaasiat malillugu ingerlapput. Danskit suliffeqarfiutaani danskit aasaanerani nalunaaqutaat malillugu ingerlatsisoqarnissaa salliutinneqarpoq.

Naallu naalakkersuisut siulittaasuata aningaasatigut kingunissat aarlerisaarutigigaluarai naalakkersuisoqatigiit partiivisa nunatsinni nalunaaquttap ingerlaqatigiiffigisaata allanngortinneqarnissaa aasaaneranilu nalunaaquttap atorunnaarsinneqarnissaa akueraat.

- Inuppassuit nalunaaquttap ingerlaqatigiiffitoqaanut uteqqinnissarput aasaaneranilu nalunaaquttamik atorunnaarsitsinissarput kissaatigaat. Tusaanngitsuusaaginnarsinnaanngilagut, Bo Martinsen (D) naalakkersuisuni partiit pingasut ataatsimut nalunaarutaani oqarpoq.

Taamaammat tamarmik Naleraq – taaseqataanngitsoq – minillugu Siumup siunnersuutaata arlalinnik allannguutissanik siunnersuuteqarfigalugu inatsisissatut ataatsimiititaliamut utertinneqarnissaa akuersissutigalugu taasipput.

Aasaanerani nalunaaquttap aatsaat aappaagu atorunnaarsinneqarnissaa nalunaaquttallu ingerlaqatigiiffiata allanngortinneqarnissaata 2028-mut utaqqissunneqarnissaa allannguutissatut siunnersuutigineqarpoq.

Imeqqutaallat mannii

Jens Napaattuup naalakkersuisut imeqqutaallat manniinik katersinissamut inerteqquteqarnissamik aalajangiinerannik allanngortitsinissamut periarfissaqartumik najukkami tusarniaasoqarnissaanut inatsisissatut marlunngornermi aamma siunnersuuteqarpoq.

Naalakkersuisulli akissumminni imeqqutaallat suli ikiliartortut, Pinngortitaleriffiup imeqqutaalat piaqqiorfiannit nalunaarusiaanni kingullermi paasineqartoq erseqqissaatigaat.

- Naalakkersuisut piniartut atuisullu ilisimasaat pigineqartut pisuussutinik uumassusilinnik aqutsinermi ilaanissat pingaartippaat, piniarnermut naalakkersuisoq, Peter Borg (D) siunnersuut Upernaakkut ataatsimiinnermi siullermeerneqarmat oqarpoq.

Taamaammat Inatsisartut imeqqutaallat manniinik katersisinnaaneq pillugu najukkami kingusinnerpaamik 2027-mi tusarniaasoqarnissaanut siunnersuut aamma akuersissutigaat.

Inatsisartut tamatuma saniatigut nunatsinnut nuuttunut piniarusuttunut piumasaqaateqarnerunissaq aamma tunngaviusumik inatsisiliortoqarsinnaanera marlunngornermi aamma oqaluuserineqarput.