Ilisarititsineq: Sisimiormiu inuusuttumiit naalakkersuisumut talerpillermut
- Sivisuumik peqqissaartumillu isumaliutigereerlugu paasivara politikkip qimannissaa uannut pitsaanerpaassasoq.
Facebookimi ulloq 16. juuli ikkussami takisuumi Demokraatini siulittaasuugallartoq, Randi Vestergaard Evaldsen, oqaatsinik taakkuninnga aallarniivoq. Tassani kikkut tamaasa – qinersisartuniit ilaquttanut suleqatinullu – qinikkatut ukiuni tallimani atuussimanerminut qujassuteqarfigai.
AAMMA ATUARUK Randi Vestergaard Evaldsen trækker sig fra politik
Inatsisartuni aamma Kommuneqarfik Sermersuumi kommunalbestyrelsemi ilaasortaaffigisamini qinikkatut atuuffimmi qinersiviusut marluk akornini tunuarpoq. Kalaallit Nunaanni Brugsenimi pisiortornermut pisortatut atorfimmik neqeroorfigineqarneq politikkikkut sulinermit pingaarnerutippaa.
- Inuuninnii ingerlariaqqikkusunnermut unammilligassanillu nutaanik misileerusunnermut killissimavunga, Kalaallit Nunaanni Brugsenimiit tusagassiuutinut nalunaarummi Randi Vestergaard Evaldsen oqarpoq.
Nuka Randi Vestergaard Evaldsen
Ukiui: 35 år
Najugaqarfia: Nuuk – Sisimiuniit nuuppoq
Inuttut inissisimanera: Bo Klarskov Larsen katissimavaa
Ilinniarnera: Nordjyllands Erhvervsakademimi serviceøkonomi takornariaqarneq specialeralugu 2008.
Sulinermini ingerlanera: Tele-Postimi 2013-miit 2015-imut ilinniartoq
Politikkikkut atuuffii: Demokraatit inuusuttaanut siulittaasoq, 2014-15 Demokraatini siulittaasup tullia, Inatsisartunut ilaasortaq 2014 - 2019, Demokraatit siulittaasuat 2015-18, aatsitassanut aningaasaqaarnermullu naalakkersuisoq 2015-16, inuussutissarsiornermut, sulisoqarnermut aamma niuernermut naalakkersuisoq 2015-16 (qaammatit marluk). Kommuneqarfik Sermersuumi kommunalbestyrelsemut ilaasortaq 2014-2019.
Qinigaarlaamiit naalakkersuisumut inuusuttumut
Demokraatini qaffakkiartupiloortoq nunatsinni illoqarfiit annersasa tullianni Sisimiuni alliartorpoq, GU Aasiannilu 2004-mi ilinniarnertuunngorluni. Aalborgimi ilinniagarpoq, tassanilu Nordjyllands Erhvervsakademimi serviceøkonomitut takornariaqarneq specialeralugu 2008-mi naammassilluni.
Kisianni nunatta tamarmi ineriartortinnissaa takornariaqarnerup ineriartortinnissaanit pingaartinnerusimavaa.
aamma atuaruk Niels Thomsen Inatsisartunit sulinngiffeqarpoq
Inatsisartuni inissinnissaminut qinersisartunit tapersersorneqarnermigut qaammatit marluk qaangiummata qinigaavoq, ukiorlu ataasiinnaq ilaasortaareerluni aningaasaqarnermut aatsitassanullu naalakkersuisunngorpoq.
Liberaliusutut innuttaasut ataasiakkaat kiffaanngissuseqarnissaat ilaatigut pimoorullugu sulissutigisimavaa. Assersuutigalugu suliami imigassanik tuniniaanermut tunngasumi, tassani killilersugaanermiit innuttaasut akisussaffimmik namminneq tigusinissaat Demokraatit tunngavilersuutigisimavaat.
Assortuuttoqarnissaa piareersimaaffigisariaqarpoq – oqaaserlu atugara utoqqatsissutigereerlugu angisuunik imaluunniit sisannik issoqartariaqarpoq.
- Uannulli pingaarnerpaasimavoq erninermut atatillugu sulinngiffeqarnissap sivitsorneqarnissaa, taamami angajoqqaat toqqissisimasumik aallartitsisinnaassammata. Inuiaqatigiinnut iluaqutaassaaq, ilaqutariit nukittunerit pilersissagatsigit, oqarpoq.
Ukioq ataaseq Naalakkersuisutut inissisimavoq, Demokraatit Atassullu peermata taavalu IA aamma Partii Naleraq ikkullutik.
Issuit sisaat
Inatsisartunut ilaasortaalluni sakkortusinnaaqaaq, Randi Vestergaard Evaldsen oqaluttuarpoq.
- Inatsisartuni ilaasortaaneq nuannersuinnaaneq ajorpoq. Assortuuttoqarnissaa piareersimaffigisariaqarpoq – oqaaserlu atugara utoqqatsissutigereerlugu: angisuunik imaluunniit sisannik issoqartariaqarpoq – tassami assortuuttoqartuaannarmat. Inatsisartunut ilaasortaassagaanni sapiissuseqartariaqarpoq piumassuseqartariaqarlunilu, taamaattumillu tassani ilaasortaasut tamaasa assut ataqqivakka. Piumasaqarfioqaarmi. Ulloq unnuarlu alaatsinnaaneqarfiuvoq, oqarpoq.
AAMMA ATUARUK Politikkimit tunuartoq: Randi Vestergaard Brugsenimi pisiortornermi pisortaassasoq
Randi Vestergaard Evaldsen Sermersuumi kommunalbestyrelsemut 2017-imi qinigaavoq. Ingammik inuusuttunut suliffissaqartitsiniarnissaq pingaartillugu qinigassanngortippoq.
- Inuusuttortavut allanngortoqarnissaanik sakkortuumik kissaateqarput. Inuusuttut tusaajumannginnatsigit periarfissinnagillu nunatsinniit aallartariaqalernerannik kinguneqartoq ilumoorsinnaannngilaq. Tamanna allanngortinniarpara, marsimi 2017-imi taama nalunaaruteqarpoq.
Kommunimi politikkernermi erseqqissuuneq
Isumaginninnermut tunngasut aamma kommunalbestyrelsemi demokraatimut pingaaruteqarsimaqaat. Upernaaq manna sakkortuumik isornartorsiuivoq, ilaatigut massakkut borgmesteriusimasoq Asii Chemnitz Narup (IA) taassumalu pingaartumik Tasiilami isumaginninnikkut pissutsinik passussinera pillugu uparuartorlugu.
Taamatut ingerlaneq tunngavigalugu borgmesteri atuuffimminit tunuarpoq politikkilu qimallugu.
Politikkikkut akerlerisaa massakkut assinganik iliorpoq – taannali allamik peqquteqarluni, tassa politikkip avataani suliffeqalerami.
- Malugisinnaavara iperaasariaqalerlunga ingerlaqqittariaqarlungalu. Eqqortumik aalajangersimallunga malugisinnaavara. Inuuninni ingerlariaqqinnissaq tullinnguuppoq, facebookimi Randi Vestergaard Evaldsen allappoq.
