Politikkimit tunuartoq: Randi Vestergaard Brugsenimi pisiortornermi pisortaassasoq
Randi Vestergaard Evaldsenip politikkimik suliaqarnerminit tunuarniarluni juulillu 31-anni naggataamik Demokraatit Inatsisartuni Kommuneqarfik Sermersuumilu kommunalbestyrelsianni siulittaasorigallagaattut sulissalluni ullaaq manna nalunaarutigaa.
Randi Vestergaard Evaldsen aggustip aallaqqaataat 2019-imit Kalaallit Nunaanni Brugsenimi pisiortornermut pisortatut atorfinissaaq. Nunatsinnilu Brugsenip niuertarfiini tamani pisiortornerit akisussaaffigilerlugillu pisiortortartunut nioqqutissanullu pilersaarusiortartunut aqutsisuulissaaq.
Nukissiorfinni pisiortortooreersimasoq
Randi Nukissiorfinni pisiortornerrni pilersaarusiortuunikuuvoq, taamaammat pisiortornermi pisortatut suliffik Randimut nutaaviunngilaq.
- Kalaallit Nunaanni Brugsenimi pisiortornermi pisortatut atorfininnera qujamasuutigeqaara. Suliffeqarfik inuiaqatigiinnik, avatangiisinik, akisussaassusermillu tunngaviusumik ersarissunik naleqartitaqarmat soqutigilluinnagaraara, Randi Vestergaard Evaldsen oqarpoq.
AAMMA ATUARUK Randi Vestergaard Evaldsen trækker sig fra politik
- Nukissakka, piginnaasakka, misilittakkakka nutaamillu sammisaqarusussuserma inuiaqatigiinni allatut atornissaat qilanaarinerpaavara nalunagulu taakku pingaartinneqassasut, Randi Vestergaard Evaldsen oqarpoq.
Aqutsisoqatigiinniissasoq
Brugsenip pisortaata, Susanne Christensenip, Randi Vestergaard Evaldsenip atorfinittussanngornera aamma nuannaarutigaa.
- Randi pisiortornermi pisortatut atorfininnissaminut akuersimmat nuannaaqaanga, suleqatiginissaalu qilanaaraarput. Piffissami Kalaallit Nunaanni Brugsenimut soqutiginarluinnartumi siuariartorfiusumilu nutaanillu suliniutissaqalerfiusumi suliassami pisortaanermilu piginnaaneqarluarpoq. Tamatuma saniatigut nuannaarutigaara aqutsisoqatigiit arnamik suli allamik ilaneqarmata, pisortaq oqarpoq.
Randi Vestergaard Evaldsen nunani tamalaani niuerneq aamma niernermi tuniniaaneq pillugit takornariartitsinermillu ilinniagaqarpoq.
Randi Vestergaard Evaldsen Demokraatit siulittaasuattut 2016-imi februaarimi toqqarneqarpoq. Niels Thomsenillu Inatsisartunut upernaaq 2018-imi qinersisoqarnerata kingorna siulittaasunngornissaata tungaanut siulittaasuulluni.
Politikeritut tunuartoq Kommuneqarfik Sermersuumi borgmesterip tulliatut qaammatip ataatsip matuma siorna tunuarnissami tungaanut atuuffeqarsimavoq. Randi Demokraatit siulersuisuniiginnassaaq.
