Siku pillugu: Atiata allanngortinneqarnera ajunngilaq, eskimoli aamma ajorisassaanani
Sikunik nioqqutissiortup Hansens Is-ip sikuliamik ilaat mamarineqarluartoq Eskimomik atilik marlunngormat allamik atserpaa. Siku taanna vaniljemik akoqarlunilu sukkulaamik qalligaavoq.
- Kalaallinit attavigineqartarpugut, taakkualu sikup allamik atserneqarnissaa pingaaruteqartupilussuunerartarpaat. Isumaallu tusarnissaat pingaartittupilussuuarput. Tassami Danmarkimi hr. aamma fru Jensenikkuunngitsut - ingammilli kalaallit Issittormiullu allat isumaat sikuliatta allamik atserneranut sunniuteqarput, tuniniaanermut pisortaq Anders Eibye KNR-imut oqarpoq.
AAMMA ATUARUK Sikunik nioqqutissiortoq: Kalaallit isumaat pingaartittupilussuuagut
Taamaammat Hansens Is-ip sikuliani taanna O’Payo-mik atserpaa, sukkulaamut qalliutaasumut atsiullugu.
Nuummi Brugsenip saavani apersukkavut tamanna pillugu isumaat assigiinngisitaalaarput.
Else Egede Lynge:
- Qaqutigut sikutortarpunga… Atiatali allanngortinneqarnera ajoriffissaqartinngilara. Inuiannummi taaguutit assigiinngitsut - soorlu niigeri eskimolu - oqallisaasorujussuupput. Taaguutit taakku akarnaatsuusorinarsorineqarpata atianik allannguisoqarnera ajoriffissaqartinngeqaara.
Bent Lundblad:
- Isumaqarpunga Eskimomik ateqarnera ajorisassaanngitsoq. Ateq O’Payo sungiusimanngilara...
Eskimomik ateqarnera sooruna ajorisassaanngissorigit?
- Asuki, eskimomimmi taasaratsigu taama taassallugu sungiusimaneruarput. O’Payo… aatsaavissuaq tusarpara.
Frisko Premierilu sikuliatik aqqi eskimotaqartiinnarniaraat
Danmarkimi oqaatsit pillugit aalajangiisartut oqaaseq eskimo ammip qalipaataa tunngavigalugu assigiinngitsinertut isigineqarsinnaasutut nalilermassulli, sikup taassuma Eskimomik ateqarnera Danmarkimi oqallisaavoq.
Sikunik nioqqutissiortup allap, Friskop, sikuliaata ilaat 'Eskimomik' aamma ateqarpoq. Sikulli aqqa Friskomit akarnaatsutut misigisimanartinneqanngitsoq, Unilever Friskomik piginnittoq juunimi ilisimatitsivoq.
AAMMA ATUARUK Aaja Chemnitz sikunik nioqqutissiortunut: Oqaaseq eskimo atorunnaarsiuk
Amerikamili sikunik nioqqutissiortup Dreyer's Grand Ice Cream-ip sikuliamik ilaat Eskimo Pies ukiup naanerani allamik aamma atsissavaa. Siku taanna 1920-mili nioqqutissiarilerpaa.
Danmarkimi sikunik nioqqutissiortuni annerpaap Premier Is-ip, Hjem-IS-imik aamma piginnittuusup, sikuliamik ilaat "Kæmpe Eskimo"-mik ateqartiinnassagaa, niuernermi pisortaq Claus Dahlmann Larsen ilisimatitsivoq.
