Aaja Chemnitz sikunik nioqqutissiortunut: Oqaaseq eskimo atorunnaarsiuk
Kalaallit ilarpassuisa oqaaseq eskimo nikassaatitut isigaat. Taamaammat sikunik nioqqutissiortut oqaaseq taanna atorunnaarpassuk isumatusaarnerussasoq, Folketingimi ilaasortaq Inuit Ataqatigiinneersoq Aaja Chemnitz Larsen isumaqarpoq.
- Oqaaseq eskimo kalaallit ilarpassuisa nikassaatitut isigaat. Taamaammat oqaatsimik taassuminnga atuiunnaarnikkut ataqqineqarnissarput pissusissamisoorluinnarpoq, Aaja Chemnitz Larsen oqarpoq.
AAMMA ATUARUK Sikunik nioqqutissiortoq: Kalaallit isumaat pingaartittupilussuuagut
Sikunik nioqqutissiortup Hansens Is-ip oqaaseq eskimo nioqqutissiamik ilaannut atorunnaassallugu ataasinngormat aalajangiutereeraalu, Aaja Chemnitz Larsen taama isummerpoq.
Kisianni sikunik nioqqutissiortoq alla, tassa Premier Is nioqqutissiamik ilaat "Kæmpe Eskimo"-mik ateqaannassasoq aalajangerpoq.
Assigiinngisitsineq nikassaanerlu
Sikunik nioqqutissiortut allat Hansens Is-itulli iliortariaqaraluartut, Aaja Chemnitz Larsen isumaqarpoq.
Oqaaseq eskimo isumaqarpoq neqituumasoq, taamaammat nikassaarpasissuusinnaasarnera taama isummernerminut tunngavilersuutigaa.
Kalaallillumi ilarpassui "eskimo"-mik taaneqaratik "inuit"-mik taaneqarusunnerusartut, Aaja Chemnitz Larsen oqarpoq.
- Taaguut "inuit" naggueqatigiittut kinaassuserput eqqarsaatigalugu allatorujussuaq tamakkiinerusumillu ersersitsivoq. Neqituumasuinnaanngilagummi, kinaassutsitsigummi allarpassuarnik aamma pissuseqarpugut, Aaja Chemnitz Larsen oqarpoq.
AAMMA ATUARUK Sikunik nioqqutissiortup Hansens Is-ip sikuliani Eskimo allamik atseraa
Nioqqutissat eskimotalimmik atillit allamik atserneqarnerat pingaaruteqarpianngissorinarsinnaagaluartoq kalaallit eqqartorneqartarnerannut pingaaruteqarsinnaasoq, taanna isumaqarpoq.
- Kalaallinik eqqartuinermi assigiinngisitsisoqarsinnaasarnera nikassaasoqarsinnaasarneralu akiornissaat matumani pineqarpoq.
- Taamaammat pingaaruteqarpianngissorinarsinnaagaluartoq pingaaruteqarpoq, Aaja Chemnitz Larsen oqarpoq.
Sikunik nioqqutissiortoq Premier Is nioqqutissiamik ilaat eskimotalimmik ateqaannassasoq aalajangerpoq, nioqqutissiamilu taama ateqarnera eqqaakulunnermik aallaaveqartoq tunngavilersuutigalugu.