Sikunik nioqqutissiortup Hansens Is-ip sikuliani Eskimo allamik atseraa
Danmarkimi sikunik nioqqutissiorfik Hansens Is sikuliami atia allangortissasoq aalajangerpoq. Siku taanna vaniljemik solbærillu simersianik akulik sukkulaamik qallersimavoq.
Siku taanna Eskimomik maannamut ateqarpoq - allamilli maanna atserneqarluni.
Pisisartorpassuit sukuliorfimmut naammagittaalliuteqareersullu tamanna pisoq, Hansens Is KNR-imut ilisimatitsivoq.
Ateq taanna ilisimasat killeqarnerisa nalaanni atsiunneqarsimasoq, Hansens Is-ip sikup atiata allanngortinneqarneranut pissutaanerarpaat.
- Taamatut aalajangerneq uagutsinnut imaannanngitsuuvoq tussunngunarlunilu, kisianni ullutsinni akisussaassuseqarluta qanoq pissusilersornissatsinnik ilisimanninnerput tanngassimaarutiginngitsoorsinnaanngilarput, Hansens Is-ip tuniniaanermut pisortaa Eibye Hansen tusagassiorfinnut nalunaarpoq.
AAMMA ATUARUK Sikunik nioqqutissiortoq sikuliami aqqanik Eskimotalimmik allannguinissaminut nangaasoq
Siku taanna O`Payo-mik atserpaa, sukkulaamut qalliutaasumut atsiullugu.
Danmarkimi oqaatsit pillugit aalajangiisartut oqaaseq Eskimo ammip qalipaataanik assigiinngisitsinertut isigineqarsinnaasutut nalilermassulli, sikup taassuma Eskimomik ateqarnera Danmarkimi oqallisaavoq. Sikunik nioqqutissiortup allap, Friskop, sikuliaata ilaat 'Eskimomik' aamma ateqarpoq.
Sikulli aqqa Friskomit akarnaatsutut misigisimanartinneqanngitsoq, Unileverimi Friskomik piginnittumi tusagassiinermik akisussaasuusoq Sandhya Forselius juunimi oqarpoq.
- Sikuliarput "Kæmpe Eskimo" Danmarkimi tunisaalluartuaannarpoq, atialu pillugu danskinik pisisartunik mamiatsattunik narrujuummertunilluuniit tusagaqarnikuungilagut, Sandhya Forselius allappoq.