Sikunik nioqqutissiortoq sikuliami aqqanik Eskimotalimmik allannguinissaminut nangaasoq

Amerikamiut sikup Dreyer´s Grand Ice Creamimeersup "Eskimo Pie" allamik ateqalernissaa sungiunniartussanngorpaat.

Eskimo nikanarsaatitut paaasineqarsinnaavoq, taamaammallu tunisassiortup, Nestlemit pigineqartup, aqqa allanngortinniarpaa.

Danmarkimi sikunik arlalinnnik aqqani "Eskimo"-talimmik tunisassiortoqarpoq, ilaatigut nioqqutissiorfiup Friskop "Kæmpe Eskimo" tunisassiaraa.

Sikulli aqqa Friskomit akarnaatsutut misigisimanartinneqanngitsoq, Unileverimi Friskomik piginnittumi tusagassiinermik akisussaasuusoq Sandhya Forselius taama oqarpoq.

- Sikuliarput "Kæmpe Eskimo" Danmarkimi tunisaalluartuaannarpoq, atialu pillugu danskinik pisisartunik mamiatsattunik narrujuummertunilluuniit tusagaqarnikuungilagut, Sandhya Forselius allappoq.

AAMMA ATUARUK Friskop Kæmpe Eskimo atuinnarniarpaa

Issittormiut Aasiamiunit kingoqqisut nunatsinni najugaqartut danskit ordbogiat, Den Danske Ordbog, naapertorlugu "Eskimo"-mik taaguuteqarput.

Tassanili oqaaseq mamiatsannartutut misigineqarsinnaasoq, taaguullu Inuit nunatsinni, Canadap Avannaani, Alaskami Sibiriallu ilaani iluarineqarnerusoq aamma allassimavoq.

- Naligiinnerulernissamut akuunerulersitsinissamullu - nunarsuarmullu akaareqatigiiffiunerusumut tapertaaalluarsinnaalluta takugutsigu, tusarnaarnissamut, allanguinissamut akisussaassuseqarnissamullu piareeersimavugut, Unileverimeersoq Sandhya Forselis allappoq.

Amerikamiut siku tunisassiartik " Eskimo Pie"-mik atilik qanoq ateqalersinniarneraat suli nalunarpoq. Aqqali ukiup nikinnerani saqqummiunneqassaaq.