Friskop Kæmpe Eskimo atuinnarniarpaa

Taaguut eskimo nikassaanerusoq oqaatsit pillugit Danmarkimi aalajangiisartut, Dansk Sprognævn, naliliileereerput. Taamaakkaluartoq sikup Kæmpe Eskimop taaguutaa allanngortinneqassanngilaq.

Allattoq Thomas Munk Veirum

septembarip 11-at 2016 12:24

Sikup taaguutaa allanngortinneqassanngitsoq, sikumik nioqqutissiortoq Frisko oqarpoq. Aviisi Ekstra Bladet nittartakkami taama allaaserisaqarpoq.

Aamma atuaruk USAmi eskimo, negerit kangiamiullu atorunnaarput

Sikunik nioqqutissiortup Friskop Kæmpe Eskimo nioqqutissiaraa.

- Kæmpe Eskimomik ukiorpassuarni taaguuteqarpoq. Nikassaanermut, assigiinngitsitsinermut ataqqinninnginnermullu attuumassuteqartinngilarput. Nunarsuarmi tamarmi ingerlatsiviit ilaanniippugut, inuillu qanorluunniit inuiaassuseqaraluarpata ataqqivagut, Friskomi tuniniaanermut ingerlatsisoq, Henrik Funder, Ekstra Blademut oqarpoq.

Aamma atuaruk Eskimomik taagorneqarnermit Inummik taagorneqalernermut

Oqaaseq eskimo Inunnut atorneqaraangat qallunaat nikassaanertut paasisaraat, oqaatsit pillugit Danmarkimi aalajangiisartuneersoq Anita Ågerup Jervelund isumaqarpoq.

- Apeqqutaavoq qanoq taaneqarusunnersut. Amerlanerilli Inuit inuiattut taaguutigerusunneruaat, tamannalu ataqqineqassaaq, Anita Jervelund nassuiaavoq.