Saqqummersitsineq aalassatitsisoq: Katersugaasivimmi aqutsisuusimasoq nunatsinnit aallalersoq
Danskip atisanik ilusilersuisartup eqqumiitsuliortullu Jim Lyngvildip puisip amiinik atisaliami assilinerinik Ilulissani Eqqumiitsulianik Katersugaasivimmi saqqummersitsiniarnera 2022-p aallartisimalernerani nalunaarutigineqarmat qiimmaallaataallunilu mamiatsaataavoq.
Eqqumiitsuliat amerlasuunit misigissutsikkut aalassaataanissaat ilimagineqareerpoq. Katersugaasivimmili aqutsisoq saqqummersitsinissamillu suliniuteqartoq, Mads Mitchell, soraarsitaarataarmat suliaq oqallisaangaatsialerpoq.
Mads Mitchell sulisitsisorisimasaminik Avannaata Kommunianik kommunemilu pisortaanermik, Nick Nielsenik marsimi 2022-mili akerleriissuteqalerpoq.
Taannami isumaqarpoq soraarsitsinermi kommunimi pisortaaneq kommunilu inatsisinik arlalinnik unioqqutitsisimasut, aamma Mads Mitchellip Nick Nielsenimik politiinut tunniussereernerani.
Atorfilittanit marlunnit eqqunngitsuliorfigineqartoq
Mads Mitchell suliani marlunni Avannaata Kommunianut kommunemilu pisortaanermut, Nick Nielsenimut, tunngasuni taperserneqarpoq. Maannalu taperserneqaqqippoq.
Katersugaasivimmimi aqutsisuusimasup suliami inuttut ataqqinassutsiminillu, kommuni Nick Nielsenilu innarliisimanerarlugit eqqartuussivilersuutereerlugillu isumaqatigiissuteqarpoq.
Tamaattorli nunarput tassunga oqaluttuaannanngulerpoq. Ukiummi marluk Ilulissaneereerluni ilaquttanilu Danmarkimut nuuttussanngorput.
Mads Mitchellip kommunemik Nick Nielsenimillu akerlerleriissuteqarneq inunngorfimmi qimattariaqalerneranut pissutaaqataasoq isertuutinngilaa.
- Illoqarfimmi inuit pissaaneqarnerpaat ilaannik akerleriissuteqarneq imaannaanngilaq. Asanninneq, paasineqarneq tapersersorneqarnerlu illoqarfimmi misigaara, taamaattorli suliaq soorunami sunniuteqarpoq, taanna oqarpoq.
Mads Mitchell: Ilumoorlunga misigivunga
Nick Nielsen paasissutissanik Mads Mitchellimut aamma eqqumiitsuliortumut atisanillu ilusilersuisartumut Jim Lyngvildimut tunngasunik siammarterisimasoq Mads Mitchellip eqqartuussivilersuussinerani atuarneqarsinnaavoq. Kommunimi pisortaaneq nipangiussisussaatitaanerminik unioqqutitsisimasutut 5.000 koruuninik akiligassinneqareerpoq.
Mads Mitchellittaaq isumaqarpoq Nick Nielsenip kommunimi qaffasissumik atorfeqarnini atornerlullugu Mads Mitchellimut tunngasunik nalunaarsuiffik pissarsiariniarsimagaa. Kommunimi pisortaanerup Mads Mitchellimut tunngasut paasissutissat allanut oqaatigeqqusaanngitsut atorlugit Mads Mitchell peqquserluttuliortuunerarlugu Odense Kommunemut unnerluutigisimavaa. Suliaq Fynimi kommunemit itigartitsissutigineqarpoq.
Mads Mitchell 25.000 koruuninik taarsiiffigineqarnissamik piumasaqaqqaaraluarpoq, illuatungeriilli 15.500 koruuninik taarsiissuteqartoqarnissaannik isumaqatigiissuteqarput.
- Utoqqatserfigineqanngisaannarpunga, Nickilli uannut iliuusaata eqqunngitsuuneranik misiginera ilumoortuusoq isumaqatigiissuteqartoqarmat misigivunga, Mads Mitchell oqarpoq.
KNR-ip Nick Nielsen oqaaseqartinniaraluarpaa. Taanna oqaaseqarusunngilaq, Sermitsiaq.AG-mulli akissuminnut innersuusilluni:
- Inuiaqatigiinni eqqartuussiveqarnerput pitsaavoq, kikkulluunniit inatsimmit annerunnginnerannik aamma qanorluunniit pisortaatigigaluaraanni iliorsinnaannginnerannik tamanna isumaqarpoq. Tamanna nuannaarutigaara. Kukkunera nassuerutigaara akiligassarlu akilerlugu, Nick Nielsen oqarpoq.
Siunissami uteqqikkusuttoq
Kukkusimannginnini tamanit takuneqarsinnaasoq Mads Mitchell isumaqarpoq, taamaattorli ilaquttanilu nunatsiniiginnarsinnaanmgikkallarnertik pillugu isumaqatigiissimapput.
Mads Mitchellilli siunissami uteqqikkumaarnissi neriuutigaa.
- Maani najugaqarneq nuannernerpaavoq. Danmarkimi inuit imminnuinnaq isumaginerupput. Kalallit Nunaanni sorpassuarnik ataatsimoorussaqartarneq nuannareqaarput. Maani angerlarsimasutut misigisarpunga, inooriaaserlu uannut iluarpoq. Inuunermalu sinnerani tikittarumaarpunga, maanngaqqinnissarpullu oqaluuserinikuuarput, Mads Mitchell naggasiivoq.
Suliaq Avannaata Kommuniani kommunip pisortaaneranut Nick Nielsenimut kinguneqartinneqassanersoq KNR-imiit paasiniaraluarparput. Suliarli inunnut ataasiaakkaanut tunngammat borgmester Palle Jerimiassen oqaaseqarusunngilaq.
