Kalaallit eqqumiitsuliortut piumanngimmata, Jim Lyngvild sassarpoq

Ilulissani eqqumiitsuliornermi katersugaasiviup saqqummersitsinissamut pilersaarusiorsimannginnerata, Jim Lyngvildimut matumik ammaassivoq. Kalaallilli siulliullugit aperineqaqqaarput, taakkuli piffissami tassani pisinnaanngillat.
- Kalaallinik eqqumiitsuliortunik piffisap taama sivikitsigisup iluani iluatsitsisinnaasimannginnama, JIm Lyngvild aperaara, Mads Mitchell oqarpoq.
februaarip 21-at 2022 16:33

Ilissani eqqumiitsuliornermi katersugaasivimmi aqutsisoq nutaaq, Mads Mitchell decembarip ulluisa 16-iani atorfinippoq, taamani saqqummersitsinissamut pilersaaruteqartoqanngilaq, kingornalu ulappuserpoq.

Naatsorsuutiginngisaminillu qaammatit marluk qaangiutiinnartut oqallittoqangaatsialerpoq, kalaallit kulturiat aallaavigalugu eqqumiitsuliortut kikkut saqqummiisinnaanersut pillugit annertuumik oqallittoqalerpoq.

AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq

Oqallitsitsinermili pilersiteqataanini taassuma peqqissimissutiginngilaa:

- Peqqissimissutissaqanngilanga, illuatungeriissillunili avissaartuuttoqarnera ajuusaarutigaara, Mads Mitchell oqarpoq.

Kalaallit eqqumiitsuliaannik ujaasineq iluatsippallaanngitsoq

Ilulissani eqqumiitsuliornermi katersugaasivik qanga niuertut najugaqarfigisarpaat, ukiorpassuanngortunilu maanna kalaallit nutaalianik eqqumiitsuliaannik saqqummersitsiviusarluni.

Katersugaasivimmi aqutsisup siulia ukiup affaata matuma siorna soraarneraniit katersugaasivik ukioq affaq aqutsisoqanngereersoq, Mads Mitchell atorfinippoq.

AAMMA ATUARUK Ivínguak Stork Høegh Great Greenlandip nioqqutaanik pisiumajunnaarniarneq pillugu: Annilaangavunga

- Taava Facebookimi quppernermi takoriasaarpara, Jim Lyngvild puisip amia atorlugu eqqumiitsulianik saqqummersitsisaqattaartoq. Attaveqarfigaara, ingerlaannarlu nalorninngivilluni isumassarsiannut peqataalerpoq, saqqummersitserusullunilu.

Kalaallinik eqqumiitsuliortunik toqqaasimannginerminut isornartorsiorneqartoq

Eqqumiitsulianilli katersugaasiviup Jim Lyngvild saqqummiisinniarlugu aalajangernera ajornartorsiutitaqanngitsuunngilaq.

Danskip eqqumiitsuliortup, Jim Lyngvildip Kalaallit puisit amiinik atisanik ilusilersuisarnerat assilialiarai. Assit Great Greenlandip Ilulissat Art Museumillu qaaqqusineratigut suliarineqarput, assinilu puisit amiinik atisaliat, kalaallinit atorneqartut pinngortitamilu assilisaasut takuneqarsinnaapput. Assilisittut assini arlalinni uumasutut takutinneqarput, assersuutigalugu ataaseq immap killingani puisit amiinik atisaqarluni nallangavoq.

Assi © : Jim Lyngvild

Assi: Jim Lyngvild

Jim Lyngvildilu kalaallit pisataannik eqqumiitsuliornera pissusissamisuunngitsoq ilaat isumaqarput. Klaudia Petersen taakkununnga ilaavoq.

- Aasiit allamioq sinnerluta saqqummerpoq. "Uumasuutikka qaasuttut takusigit, pilersitakka takusigit. Uangaana nuna piga uangaana kalaaliutikka". Uatsinnik piginnittutut pissuseqarluni takutitsivoq, Klaudia Petersen KNR-imut tallimanngormat oqarpoq. 

Kalaallip eqqumiitsuliortup assit suliarisimassagaluarai taanna isumaqarpoq:

- Kulturerput tarnikkullu kinaassuserput asuli pisassaanngilaq, piumasaannarmik isummersorfissatut saqqummersitassaanngilaq, Klaudia Petersen oqarpoq.

Nunarput qitiutillugu nunarsuarli tamaat tikilluaqqullugu

Kalaallit eqqumiitsuliortut qulit Mads Mitchellip attaveqarfiginikuuai, taakkunanngalu arfinillip ukiup ingerlanerani saqqummersitsissasut isumaqatigalugit.

Taakku ilagaat, Paarma Brandt aamma Maria Kjærulff.

Ilulissani eqqumiitsulianik katersugaasivimmi saqqummersitsisussat amerlanerpaat kalaaliunissaat suleriuseraat.

AAMMA ATUARUK Kunstnere om Jim Lyngvilds fotoserie: Det er en sund debat, men vi må være mere åbne

Ilulissani eqqumiitsulianik katersugaasivimmi saqqummersitsisussat amerlanerpaat kalaaliunissaat suleriuseraat.

- Saqqummersitsisartut 80 procentii kalaaliusarput, 20 procentiilu nunatta avataaninngaanneerlutik, Mads Mitchell oqarpoq.

Jim Lyngvild-p assilisai nunatsinnit eqqumiitsuliat aningaasalissagai

Jim Lyngvildip assilisai marsip ulluisa 13-iannit aasap tungaanut saqqummersinneqassapput.

Oqallisingaatsiarnerullu kinguneranik takornarianik alakkagarneqarluarnissaa, eqqumitsuliornermi katersugaasivimmit neriuutigineqarpoq.

- Saqqummersitat alakkarneqarniarata akiliisitsilaarnissaq isumaliutigaara, aningaasallu isertitassat Kalaallit eqqumiitsuliortunut saqqummersitsiartortoqarnissaanut atorneqarnissaat naatsorsuutigaara, Mads Mitchell oqarpoq.

Jim Lyngvildip assilisai saqqummersinneqalerpata, eqqumiitsuliortup Ivínguak Stork Høeghip aamma Dorthea Reimer-Johansenip suliai ilanngullugit saqqummiiunneqassapput.