Eqqumiitsuliortut Jim Lyngvildip suliaanut: Oqallinneq peqqinnarpoq ammanerusariaqarpugulli

Eqqumiitsuliortut nunatsinneersut marluk atisanik ilusilersuisartup Jim Lyngvildip Great Greenland suleqatigalugu puisip amiinik atisaliai inuit attaveqaqatigiittarfiini isornartorsiorneqangaatsiartunut assigiinngitsunik isummerput.
- Eqqumiitsuliortuulluni sakkortuumik pineqarluni taamak annernartartigisoq, uanga misigisarnikooqaara tamanna, Aka Høegh oqarpoq.
Allattoq Karline Platou, Mads Lynge
februaarip 20-at 2022 14:55

Eqqumiitsuliortut tusaamaneqarluartut marluk Julie Edel Hardenberg Aka Høeghilu Jim Lyngvildip suliaanut assigiinngitsunik isummerput.

Inuit taamatut qisuariarnerat pissusissamisoortuusoq Julie Edel Hardenberg isumaqarpoq.

- Qangali nunarput avammut nittarsaanneqaraangat avataaninngaanneersut uagut sinnerluta saqqummiisorineqaraangat, uagullu nammineq oqaluttuaatigut oqaluttuarerusukkaluarlutigit taamatut qisuariartoqartarpoq, isumaqarpunga oqallinneq peqqinnarluinnartuusoq, Eqqumiitsuliortoq isumaliulersitsisartorlu Julie Edel Hardenberg oqarpoq.

Isornartorsiuinermi ”Ilusilersuisartoq kalaaliunngimmat assit kalaallit kulturiannik atornerluisuupput” oqaatsit tamakkua ilaatigut atorneqarput.

AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq

Danmarkimi najugalik peqqissaasoq Klaudia Petersen isornartorsiuisunut ilaavoq.

- Takusassiatullusooq inuiaqatigiit sassartilluta tupaallannartuliatut oqaannaraanni uumasut nujuartatullusooq ililluta pivaatigut, oqariartuutigisai ima nipeqarput: Qivi uanga kalaaliutikka, soorlu taamatut nipilimmik saqqummernera avoqqaaraarput”, Klaudia Petersen oqarpoq.

Aka Høegh: Inuttut ammaneq ilikkartariaqarparput

Naak Jim Lyngvildip suliai isornartosiorneqaraluartut 74-inik ukiullip eqqumiitsuliortup Qaqortumilu najugallip Aka Høeghip ajoriffissaqartinngilai.

- Eqqumiitsuliortuulluni sakkortuumik pineqarluni taamak annernartartigisoq, uanga misigisarnikooqaara tamanna, uanga Jimip suliai nuannarilluinnarpakka, takusinnaavara puisip amii atorluarsimagai qalipaatilersorsimallugit qangami qalipanneqarneq ajoraluarput, Aka Høegh oqarpoq.

Nunarsuarmiooqataanerput ilutigalugu assigiinngitsunut ammanerusinnaasugut taanna isumaqarpoq.

- Inuttut ammaneq ilikkartariaqarparput, tigusisinnaaneq maanna illuigaannarnik sanaajunngilaq, suna tamarmi avataaninngaanneerpoq nunatsinni illut kiassaatit – naami qisuttarpugut, imminut tuneqatigiinneq tassa silarsuarmi taamaappoq, Aka Høegh oqarpoq.

Jim Lyngvildip suliani Ilulissat art museumimi saqqummersittussaavai, maannali Ilulissani saqqummersitsinissaminut nangaalerluni oqaatigaa.

Aamma atuaruk