Ivínguak Stork Høegh Great Greenlandip nioqqutaanik pisiumajunnaarniarneq pillugu: Annilaangavunga
Ivínguak Stork Høegh Facebookimi oqallinnermut sapaatip akunnerata naanerani ilannguppoq. Great Greenlandimit puisit amiinik pisiumajunnaarnissamut atsiornernik nittartakkatigut katersinerup iserfissaa inoqatinut attaveqaatitigut sukkasoorujussuarmik siammarpoq – erngertumillu atsiornerit 1.000-init amerlanerusut anguneqarput.
- Annilaangalerpunga. Annertuallaaqaaq. Inuit assigiinngitsut isumaat tamarmik inissaqartinneqassapput – atsiornernilli katersineq killissamik qaangiineruvoq, Ivinguak Storch Høegh oqarpoq.
Taanna Nuummi eqqumiitsuliornermik atuarfimmi pisortaavoq, oqaaseqarninili suliffimmut attuumassuteqanngitsoq erseqqissaatigaa.
- Inuit ilaat assit Greenland Greenlandilu pillugit oqallinnermik aallartitsipput. Taakku isumaannik tamatta isumaqanngilagut. Taamaammat atuarfik tassunga ilanngutitinnianngilara.
Assit pillugit assuarinninneq
Oqallinnermilu misigissutsit ilaatinneqarput. Atsiornernik katersititsineq suliami, tusilartuullunilu tappiitsuugaanni kisimi tusanngitsoorneqarsinnaasumi kingulliuinnarpoq:
Danskip eqqumiitsuliortup, Jim Lyngvildip Kalaallit puisit amiinik atisanik ilusilersuisarnerat assilialiarai. Assit Great Greenlandip Ilulissat Art Museumillu qaaqqusineratigut suliarineqarput, assinilu puisit amiinik atisaliat, kalaallinit atorneqartut pinngortitamilu assilisaasut takuneqarsinnaapput. Assilisittut assini arlalinni uumasutut takutinneqarput, assersuutigalugu ataaseq immap killingani puisit amiinik atisaqarluni nallangavoq.
AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq
Jim Lyngvildilu kalaallit pisataannik eqqumiitsuliornera pissusissamisoorsuunngitsoq ilaat isumaqarput. Kaudia Petersen taakkununnga ilaavoq.
- Asiit allamioq sinnerluta saqqummerpoq. "Uumasuutikka qaasuttut takusigit, pilersitakka takusigit. Uangana nuna piga uangaana kalaaliutikka". Uatsinnik piginnittutut pissuseqarluni takutitsivoq, Klaudia Petersen KNR-imut tallimanngormat oqarpoq.
Kalaallip eqqumiitsuliortup assit suliarisimassagaluarai taanna isumaqarpoq:
- Kulturerput tarnikkullu kinaassuserput asuli pisassaanngilaq, piumasaannarmik isummersorfissatut saqqummersitassaanngilaq, Klaudia Petersen oqarpoq.
Eqqumiitsuliorneq killilersugaanngitsoq
Atsiornernillu katersineq aallartinneqarpoq. Tamatuma kingunerisaanik arnat arlallit Great Greenlandimit puisip amianik atisalianik atorlutik assiminnik sapaatip akunnerata naanerani Facebookikkut ikkussuilerput. Ivínguak Stork Høegh taakku ilagaat.
- Inuit ikittuinnaat tamanut atortutut oqaatiginnissanngillat, taanna oqarpoq.
- Eqqumiitsuliorneq sumiuussuseqanngilaq. Inunnik mattussisinnaanngilagut. Aamma Jim Lyngvildip sumik paasinnissimannginneranik isumaqarnersut paasisinnaanngilara. Mattussigutta ineriartorsinnaanngilagut. Siunissami namminiilivikkusuppugut – kisianni taama pissusilersorutta kikkut suleqatigerusussavaatigut?
Assi: Jim Lyngvild
- Jim Lyngvild uatsinnut kulturitsinnullu ajortumik iliuuseqanngissoraara. Nammineq eqqumiitsuliornissaminut isummersornissaminullu pisinnaatitaaffeqarpoq, eqqumiitsuliornermi killeqanngilaq.
- Tamatta isumaqarsinnaatitaavugut, kisianni inuit ikittuinnaat tamanut atortutut taama oqaaseqarneranni mianersussaagut. Nunatsinni inuiaqaitigiissutsimik pingaartitsivallaartutut allanillu nuannarisaqanngitsugut inuit eqqarsaatigilissavaatigut.
Taamaammat Greenlandimit kavaajani taskinilu atorlugit assini Facebookimut ikkuppaa.
- Nunatsinni piniartortagut ilaqutaasullu ataqqivakka tapersersorlugillu. Aajuku kavaajaq taskerlu kusanarluinnartut piniartortatta puisittaami amii Great Greenlandimut tunisimasaasa inernerisa ilamininngui. Minnerunngitsumillu eqqumiitsuliortut nunarsuatsinni kiffaanngissuseqarnissaat tapersersorluinnarpara.
Great Greenlandip nioqqutaanik pisiumajunnaarnissamut atsiortut maanna 1657-iupput.
