Katersugaasivimmi atorfeqarfeqarsimasup atorfillip akiligassinneqarnera nuannaarutigigaa
Avannaata Kommuniata pisortaanerata, Nick Nielsenip nipangiusimasussaatitaanerminik unioqqutitsisimanini 5.000 koruunimik akiligassitsissutiginissaa akuerimmagu tamanna Mads Mitchellip nuannaarutigaa.
- Naammassineqarnera nuannaarutigaara, kisianni tassunga killittoqarnera ajuusaarutigaara, Mads Mitchell KNR-imut oqarpoq.
Jim Lyngvildip Ilulissani Eqqumiitsulianik katersugaasivimmi saqqummersitsinissaanut oqallisaangaatsiartumut atatillugu pisortaanerup nipangiusimasussaatitaanini unioqqutillugu Mads Mitchellimik soraarsitsinissani Jim Lyngvildimut SMS-ikkut oqaatigaa.
Mads Mitchell taamani eqqumiitsulianik katersugaasivimmi atorfeqarpoq, taassumalu Jim Lyngvildip Ilulissani saqqummersitsiartornissaa suliaraa.
SMS-ikkut allagaq inunnut paasissutissanik imaqartoq isumaqarpoq, taamaammallu Nick Nielsen pinerluttuliornermik inatsimmi paragraf 50-imik unioqqutitsisimasutut politiinut siorna marsip 15-iani tunniuppaa. Suliamilu tassani taperserneqarpoq.
- Nassuerutiginninnera nuannaarutigaara, Mads Mitchell oqarpoq.
Nick Nielsenip suliap aalajangiiffigineqarneranut atatillugu KNR-imut oqaaseqarumanngilaq. Taassumali eqqartuussivimmi suliamik ingerlatsisoqannginnissaa pissutigalugu akiligassaq akilerneqartoq tusagassiuutinut nalunaarutigaa.
- Eqqartuussissuserisora suliaq eqqartuussivitsigoortinneqarpat pinngitsuutinneqassasunga isumaqarpoq, Uangali eqqartuussivimmi suliamut ukiunik arlalinnik sivisussuseqarsinnaasumut peqataanissamit akiligassamut akuersinissaq toqqarusunneruara, Nick Nielsen tusagassiuutinut nalunaarummi allappoq.
SMS-ikkut allagaq taamaalilluni kommunimi pisortaanermut immikkut akisuvoq.
Soraarsitsineq nalinginnaanngitsoq
Mads Mitchell sulisitsisorisaminut aatsaat siullermeertumik suliaqartitsinngilaq.
Soraarsitsinermi uissuumminartoq pissutigalugu Mads Mitchellip kommune suliassanngortippaa, taassumami soraarsinneqarnini eqqunngitsunik pasilliuteqarnermik tunngaveqarsoraa. Soraarsinneqarnerminut atatillugu tusarniaaffigineqarnissamut periarfissaqartinneqarsimanani aamma isumaqarpoq.
Taamaammat peqatigiiffiup, SIK-p Avannaata Kommunia suliassanngortippaa. Taamani SIK-p allattoqarfiani pisortaq, Bjarne Petersen Sermitsiaq.AG-imut ima oqarpoq:
- Takusagut tukalluinnarsimasut oqaatigineqarsinnaavoq.
Mads Mitchell kommunimut isumaqatigiissuteqarneranik tamanna kinguneqarpoq, qaammallu ataaseq akissarsiaqartinneqarluni.
Taassumalu taarsiissuteqarneq soraarsinneqarnermi naapertuilluanngitsoqarneranut suliatigullu naliliinermik tunngaveqannginnermut uppernarsaatitut isigaa.
- Soraarsinneqarnera qiviaraanni suna tamarmi eqqumiippoq. Soraarsinneqarnera kialuunniit tunngavilersinnaanngilaa – taamaallaat inuttut soqutigisanut imaluunniit Jim Lyngvildimut tunngatillugu suliamut tunngassuteqarluni, Mads Mitchell oqarpoq.
Kommunimili pisortaanerup, Nick Nielsenip akiligassinneqarneratigut Mads Mitchellip soraarsinneqarneranut suliamut atatillugu inatsisitigut maanna uniffiliisoqarpoq.
Pineqartulli kommunip kukkusumik iliuuseqarsimanini nassuerutigissagaa suli neriuutigaa.
- Neriuppunga kommunimit iliuuseqarfigineqarnera pissutigalugu borgmesterimit, Palle Jerimiassenimit utoqqatserfigineqassallunga, Mads Mitchell oqarpoq.
Palle Jerimiassenip KNR-imut oqaaseqartinniarnera periarfissaanngilaq.
