Pisortaanerup nipangiusimasussaatitaanermik unioqqutitsinini pissutigalugu akiliisinneqarnissani akuerigaa
Avannaata Kommuniani pisortaaneq, Nick Nielsen nipangiusimasussaatitaanerminik unioqqutitsisimasutut 5.000 koruuninik akiliisussanngorpoq.
Tamanna nammineq tusagassiuutinut nalunaarutigaa.
Nick Nielsen sulisoq pillugu ilusilersuisartumut, Jim Lyngvildimut Ilulissani suliaminik saqqummersitsisussamut siorna februaarip 27-ani SMS-ikkut allagaqarpoq.
SMS-imi tassani Ilulissani Eqqumiitsulianik Katersugaasivimmi maanna sulisuusimasoq, Mads Mitchell marsip naanerani soraarsinneqarumaartoq allassimavoq.
Mads Mitchelili tamanna pillugu aatsaat aqaguani februaarip 28-ani ilisimatinneqarpoq.
Tamanna pissutigalugu Mads Mitchellip Nick Nielsen atuuffimmi nipangiusimasussaatitaanerminik unioqqutitsisimasutut politiinut 2022-mi matsimi unnerluutigaa.
Mads Mitchell taamani KNR-imut ima oqarpoq:
- Nick Nielsen unnerluutiginiarlugu aalajangerpunga, uanga pillunga paasissutissanik eqqunngitsuliorfigineqangaatsiartutut misigisimagama. Atorfeqarninnut paasissutissat isertuussat allanut ingerlateqqittariaqanngimmata.
Kalaallit Nunaanni Politiit suliamik misissuiniartut Nick Nielsenilu nipangiusimasussaatitaanerminik unioqqutitsisimasutut pasineqarnissaanut tunngavissaqarnersoq naliliiniartut taama oqarput.
Akileerusunnerusoq
Politiit maanna 5.000 koruuninik akiligassinneqarnissaanik neqerooruteqarput, suliarlu taamaalilluni naammassineqassalluni.
- Eqqartuussissuserisora suliaq eqqartuussivitsigoortinneqarpat pinngitsuutinneqassasunga isumaqarpoq, Uangali eqqartuussivimmi suliamut ukiunik arlalinnik sivisussuseqarsinnaasumut peqataanissamit akiligassamut akuersinissaq toqqarusunneruara, Nick Nielsen tusagassiuutinut nalunaarummi allappoq.
Pisortaanerup, Nick Nielsenip atorfeqarnermut tunngatillugu paasissutissanik ingerlatitseqqinnermini nipangiusimasussaatitaanini unioqqutissimallugu nassuerutigineraa, KNR-imit apererusukkaluarparput.
Nicik Nielsen pisortaanertut ingerlannarsinnaanersoq nipangiusimasussaatitaanermillu unioqqutitsisimasutut akiliuteqareeruni sulisuniit suli tatigineqassanersoq aamma apeqqutigerusukkaluarparput.
Pisortaanerli Nick Nielsen KNR-imit apeqqutinut akissuteqarusunngilaq.
