Kommunip pisortaanera Jim Lyngvildimut SMS-ernera pissutigalugu politiinut unnerluutigineqartoq
Ilulissani Eqqumiitsulianik Katersugaasivimmi maanna sulisimasup Avannaata Kommuniani pisortaaneq Nick Nielsen politiinut unnerluutiginiarlugu aalajangerpoq.
Ilulissani Politiit unnerluutiginninnerup uppernarsarnerani suliaq paasissutissanik isertuussassanik ingerlatitseqqiinermut tunngasoq allappaat.
AAMMA ATUARUK Katersugaasimmi aqutsisoq Jim Lyngvildip saqqummersitsinissaanik aaqqissuussisoq soraarsitaasoq
Mads Mitchellip oqarnera naapertorlugu Nick Nielsenip taamaalilluni atorfimmut tunngatillugu nipangiusimasussaatitaanini unioqqutippaa, taamaammat pisortaaneq maanna unnerluutigaa.
- Nick Nielsen unnerluutiginiarlugu aalajangerpunga, pissutigalugu paasissutissaatinnik taama isumaginninneratigut eqqunngitsuliorfigineqangaatsiartutut misigisimagama. Atorfeqarninnut paasissutissaatikka oqaluuserisassaanngillat, Mads Mitchell KNR-imut oqarpoq.
KNR-ip Nick Nielsen unnerluutiginnittoqarneranut atatillugu apersorniaraluarpaa, taassumali suliaq oqaaseqarfigerusunngilaa.
Isertuussassamik Jim Lyngvildimut SMS-ertoq
Nick Nielsenip unnerluutigineqarnera Nick Nielsenip Jim Lyngvildimut SMS-imikkut februaarip 27-anni allagaanut tunngassuteqarpoq, allakkami tassani Mads Mitchellip marsip naanerani soraarsinneqarnissaa allassimavoq.
Haluu Jim,
Ilisimatitsiviginiarlutit, Madsip marsi ilanngullugu katersugaasivimmiinnissaa siunniukkipput. Taamaalillutit saqqummersitsinermut ammaanermullu atatillugu suleqatigisinnaavat. Taama siunniussuinerput ilisimanngilaa. Taamaammat tamanna uagut akornatsinniiginnassaaq. Tassani ajornakusoortumik, kikkut tamarmik naammagisimaarsinnaasaattut neriuutigisannik, pisoqassaaq. Inuss. Nick
Mads Mitchell Ilulissani Eqqumiitsulianik Katersugaasivimmi atorfeqarnini sivitsorneqarnavianngitsoq pillugu aatsaat aqaguani februaarip ulluisa 28-anni ilisimatinneqarpoq.
AAMMA ATUARUK Kommunimi pisortaaneq isertuussassamik imaqartumik Jim Lyngvildimut SMS-ertoq
Nick Nielsenip atorfeqartumut tunngasunik Jim Lyngvildimut allagaqarnera kukkussuteqarnerunersoq KNR-ip Actic Lawimik piginnittoq eqqartuussissuserisorlu Britta Keldsen naliliitinnikuuaa.
Taannalu ima naliliivoq:
- Minnerpaamik ingerlatsinermi ileqqorissaartuliornerunngilaq. Pisortaanerup inunnut ataasiakkaanut tunngatillugu nipangiusimasussaatitaanini unioqqutillugulu inummut paasissutissanut inatsit aamma unioqqutippaa, Britta Keldsen oqarpoq.
Britta Keldsenip unnerluutiginnittoqarneranut attuumassuteqannginnera erseqqissassallugu pingaaruteqarpoq.
Mads Mitchell: Jim Lyngvildip eqqumiitsuliai pissutigalugit soraarsitaavunga
Avannaata Kommunia naapertorlugu Mads Mitchellip suleqatigiinniarnermik unammillernartoqarneranik pissuteqarpoq, Mads Mitchellili aperigaanni nassuiaataa allarluinnaavoq.
- Uanga saqqummersitsinissamik oqallisaangaatsiartumik aaqqissuussinera pissutaasoraara tamannami ilaasa kommunimut ajortumik takutitsisoqarsoraat, Mads Mitchelle oqarpoq.
AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq
Saqqummersitsineq Mads Mitchellip innersuussutaa Jim Lyngvildip Kalaallit puisit amiutaannik ilusilersukkanik kalaallinit atorneqartunit pinngortitami assilissaanut tunngavoq.
Assit nunatsinni Danmarkimilu oqallinnermik annertuumik aallatitsipput, inuillu ilaasa Jim Lyngvildip assilisai kalaallit kulturiannik allanngortitsinerusoraat.
Qulaani assi Jim Lyngvildip Ilulissani maanna saqqummersitaasa ilaat takuneqarsinnaavoq.
Mads Mitchellilli Jim Lyngvildip saqqummersitsinissaanut atatillugu nammineq kommunimilu aqutsisup ataatsip akornanni aaqqiagiinngittoqarnikuusimasoq nassuerutiginikuuaa.
Mads Mitchellep kommunimi aqutsisup Jim Lyngvildimut suliaanillu akerlerinnittunik arlalinnik like-erisimasoq takusimallugu paasisimmallugu oqaloqatigimmagu aaqqiagiinninneq aallartissimavoq.
- Aqutsisup, uannut qaninnerpaap Jim Lyngvildimut akerliunerit like-ersimagai takusinnaavara. Facebookikkut saqqummersitat taakku Jim Lyngvildimit Great Greenlandimillu pisiumajunnaarnissamut kaammattuinerupput. Aqutsisumma uannut eqqartornagu tamanut ammasumik oqallisigigaa eqqumiigalugu allaffigaara. Taamaattoqanngissoraali, qupperninilu nammineq quppernerisarinerarlugu. Tamanna aliatsaatiginngaatsiarpara, Mads Mitchelle KNR-imut sapaatip akunnerata siuliani oqarpoq.
Politiit misissuinermik aallartitsisut
Kalaallit Nunaanni Politiit suliamik misissuisussanngorput, taakkulu Nick Nielsenip nipangiusimasussaatitaanerminik unioqqutitsineranik unnerluutiginnittoqarnissaanut tunngavissaqarnersoq nalilersussavaat.
Unnerluutigineqarnissaanut tunngavissaqartoq nalilerneqarpat suli annerusumik misissueqqissaartoqassaaq.
Tamatuma kingorna Nick Nielsenimik unnerluutiginnittoqassanersoq unnerluussisussaatitaasut nalilersussavaat.
- Unnerluussisussaatitaasut pasineqartup eqqartuussivimmi pisuutinneqarnissaanut tunngavissaqarluartoq nalilissagunikkut taanna unnerluutigineqassaaq, Kalaallit Nunaanni Politiit paasissutissiipput.