Katersugaasimmi aqutsisoq Jim Lyngvildip saqqummersitsinissaanik aaqqissuussisoq soraarsitaasoq
Saqqummersitsinissap suli ammarneqanngitsup Jim Lyngvildip assilianik takutitsinissaatulli oqallisaangaatsiarnissaa qaqutigoortuuvoq.
Eqqumiitsuliat oqallisaangaatsiartut pillugit nutaamik immikkoortortaqaleqqipput. Mads Mitchell ulluinnarni eqqumiitsulianik katersugaasivimmi aqutsisoq saqqummersitsisoqarnissaanut suliniuteqartuusoq Avannaata Kommunianit soraarsinneqarpoq.
AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq
Kommunip oqarnera naapertorlugu tamanna suleqatigiinniarnermik unammillernartoqarneranik pissuteqarpoq, Mads Mitchelleli aperigaanni nassuiaataa allarluinnaavoq:
- Uanga saqqummersitsinissamik oqallisaangaatsiartumik aaqqissuussinera pissutaasoraara tamannami ilaasa kommunimut ajortumik takutitsisoqarsoraat, Mads Mitchelle oqarpoq.
Taassuma kommunip suleqatigiinniarnermik unammillernartoqarneranik nassuiaateqarnera eqqunngitsuunerarpaa:
- Ajornartorsiutaasut pillugit oqaloqatigisaqarnangalu tusagaqanngilanga. Saqqummersitsinissap oqallisaangaatsiarnerata kingornatigut soraarsinniarneqalerpunga. Kommunip ajornartorsiutaaneragai eqqunngitsuupput, taamaammat uterteqqippaat allamillu toqqaaginnarlutik.
Jim Lyngvild pillugu ajortumik saqqummersitat aqutsisup Facebookimi like-erai
Jim Lyngvildip saqqummersitsinissaanut atatillugu nammineq kommunimilu aqutsisup ataatsip akornanni ataatsimik aaqqiagiinngissuteqarsimasoq Mads Michellep nassuerutigaa.
AAMMA ATUARUK Kalaallit eqqumiitsuliortut piumanngimmata, Jim Lyngvild sassarpoq
Mads Mitchellep kommunimi aqutsisup Jim Lyngvildimut suliaanillu akerlerinnittunik arlalinnik like-erisimasoq takusimallugu paasisimmallugu oqaloqatigimmagu aaqqiagiinninneq aallartissimavoq:
- Jim Lyngvildimut tunngatillugu oqallinnermik malinnaaninni aqutsisup, uannut qaninnerpaap Jim Lyngvildimut akerliunerit like-ersimagai takusinnaavara. Facebookikkut saqqummersitat taakku Jim Lyngvildimit Great Greenlandimillu pisiumajunnaarnissamut kaammattuinerupput. Saqqummiussat saqqummersitsinermut ajortumik allaatiginninnerupput, Mads Mitchelle oqarpoq, nangillunilu:
- Aqutsisumma uannut eqqartornagu tamanut ammasumik oqallisigigaa eqqumiigalugu allaffigaara. Taamaattoqanngissoraali, qupperninilu nammineq quppernerisarinerarlugu. Tamanna aliatsaatiginngaatsiarpara.
Aqutsisup Faceboookikkut saqqummersitat akerliusut like-ersimasaanut uppernarsaatit KNR-ip takuai.
Saqqummersitsinissaq aarlerinartorsiorpa?
Jim Lyngvildip assilianik eqqumiitsuliaanik saqqummersitsineq marsip ulluisa 13-ianni sapaammi ammassaaq. Ornigulluni assinik takunnikkiartornissamut soqutiginnittoqangaatsiarpoq. Saqqummersitsinermut isissutissat 100-t missaanniittut tunineqareerput, assilli nivinngarneqassanersut maanna qularnarpoq.
AAMMA ATUARUK Ilisimatooq: Jim Lyngvildip assilisai uagutsinnut peqqinnarput
Mads Mitchellep akiniussiniarusunnani erseqqissaatigaa:
- Jimip saqqummersitsiniarnini nuutsinniarpagu tamanna Jimip aalajangernerissavaa. Katersugaasivimmut kommunimullu innarliinissaq kissaatiginngilara. Innuttasut saqqummersitsinermik takunnissaanissaat kissaatigaara, Mads Mitchelle oqarpoq.
Pisortaaneq: Mads iluarisimavarput
KNR-ip Avannaata Kommuniani pisortaaneq, Nick Nielsen Mads Michellep isornartorsiuineranut atatillugu oqaloqatigaa. Taanna KNR-imut oqarpoq:
- Inunnut ataasiakkaanut tunngatillugu oqaaseqarsinnaanngilagut. Madsilli marsip ulluisa 16-iannit suleqatigiunnaarnera uppernarsarsinnaavara.
- Tamatumalu saqqummersitsinermut attuumassuteqannginnera erseqqissaatigerusuppara. Saqqummersitsisoqarnissaa taperserparput, Madsillu aaqqissilluni suliaqarnera kusanarluinnarpoq, pisortaaneq oqarpoq.