- Peqqinnarpoq soorlu piorsarsimassuseq eqqarsaatigalugu tassani oqallinneq ingerlanneqaraangat arlaatigut piorsarsimassutsip iluani nikeriarneq ingerlasarpoq, Rosannguaq Rossen Ilisimatusarfimmi oqaasilerinermik, atuakkialerinermik tusagassiuutilerinermillu Ph.D-lik taama oqarpoq.Assi: KNR

Ilisimatooq: Jim Lyngvildip assilisai uagutsinnut peqqinnarput

Kalaallit Nunaanni kulturikkut eriagisagut Europamiuniit sunnertisimasorujussuupput. Assuutit kalaallisuut, annoraamineq atortakkagut, sapakkat assigisaallu tamarmik nunanit allaninngaanneerput, ilisimatooq, Rosannguaq Rossen oqarpoq.

Inoqatinut attaveqaatini aamma nunatsinni nunanilu allani tusagassiuutinilu nalinginnaasuni ulluni kingullerni oqallittoqangaatsiarpoq. Oqallinneq danskip ilusilersuisartup, Jim Lyngvildip assilialiaanut, kalaallit puisit amiinik atisaliaanut assigiinngitsunik imaqartunut tunngassuteqarpoq.

AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq

Assit misigissutsitigut uivernermik pilersitsipput, ilaasali assit kusagalugillu nutaaliorneruneraraat ilaat kamapput. Jim Lyngvild ammip qalipaataanik assigiinngisitsisutut kalaallillu kulturiannik assit atorlugit innarliisutut ilaatigut taagorneqarpoq.

Rosannguaq Rossen tusagassiuutilerinermi ilisimatuujullunilu Ilisimatusarfimmi adjunktiuvoq. Tassuma kulturip ineriartornissaanut oqallinneq pisariaqarsoraa:

- Peqqinnarpoq soorlu piorsarsimassuseq eqqarsaatigalugu tassani oqallinneq ingerlanneqaraangat arlaatigut piorsarsimassutsip iluani nikeriarneq ingerlasarpoq, ilaannikkut soorlu massakkut killilersorniarneqarpoq, illuatungaani taava takuagut ilai Great Greenlandinik atorlutik saqqummertut, puisi amii saqquminerulerlutik.

Taannalu nunatsinni siullerpaalluni arnat kitaamiutut kalaallisooriaasiisa ineriartorneranik aamma ilisimatusarsimavoq.

Taassuma oqarnera naapertorlugu eriagingaakkatsinnik, tassa nunatsinni ilitsoqqussaralugulu tulluusimaarutigisatsinnik kalaaliunngitsoq eqqumiitsuliortoq ilaatigut puisip amianik ilusilersuilluni ilumut eqqumiitsuliorsinnaasoq maanna oqallittoqangaatsiarnerata takutippaa.

- Eriagisatut isigisagut uninngatiinnarutsigit eqqumiitsuliortuniit suminngaanneeraluartuniilluunniit atoqqusaanatillu taava taanna eriagisaq piorsarsimassuserluunnit qanoq ineriartussagami?, Rosannguaq Rossen aperivoq.

Sakkortuumik oqallinnermi sukangasumik nipeqartoqartoq

Nunatsinni killiligaanani oqaaseqarsinnaatitaasoqarpoq, taamaakkaluartorli Jim Lyngvildip puisip amianik atisanik assilisai pillugit oqallinneq sakkortusoq Rosannguaq Rossen isumaqarpoq.

- Torernerusinnaasutut nalilerpara, isumaqaraluarpunga oqalliseriaaseq allanngortariaqartoq. Ingammik ukua inoqatinut attaveqaqatigiittarfiit aqqutigalugit oqallittut akerartuutipajaartutut kisimik ingerlagamik.

 

Asseq una Nunatsinni nunattalu avataani annertuumik ilaatigut oqallinnermik pilersivoq. Assi: Jim Lyngvild

Eriagisagut nunatsinneersuunngillat

Kalaallit kulturiat nunanit allanit sunniivigineqangaatsiarsimasoq ullumikkullu eriaginerpaasagut nunatsinneersuunngitsut ilisimatuup erseqqissaatigaa.

- Kalaallit Nunaanni kulturikkut eriagisagut Europamiuniit sunnertisimasorujussuupput. Assuutit kalaallisuut, annoraamineq atortakkagut, sapakkat assigisaallu tamarmik nunanit allaninngaanneerput.

- Juullip ulloriaa, orpiliaq, suut tamarmik kalaallit kulturianniilernikut ullumikkut isumassarsiornermi pinngornikuupput, taamaattumik eqqumiitsuliortutut kiffaanngissuseqarneq piorsarsimassutsip iluani killilersugaannginnissaq pingaaruteqartutut uanga isigivara, Rosannguaq Rossen oqarpoq.

Assit Ilulissani eqqumiitsulianik katersugaasivimmi marsip ulluisa 13-ianni saqqummersinneqassapput. Katersugaasiviup pisortartaavata, Mads Mitchellip Jum Lyngvild assilialiornissaanik noqqaaffigisaraa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl