Kommunimi pisortaaneq isertuussassamik imaqartumik Jim Lyngvildimut SMS-ertoq
Danskeq ilusilersuisartoq eqqumiitsuliortorlu, Jim Lyngvild puisit amiinik ilusilersorlugit atisaliat kalaallinit assilisittartunit atorneqartut assilisani saqqummersikkiartorlugit ulluni makkunani Ilulissaniippoq.
Avannaata Kommuniata eqqumiitsulianik katersugaasiviani ulluinnarni aqutsisoq, Mads Mitchell katersugaasivimmi saqqummersitsinermik aaqqissuussisussaagaluartoq soraarsinniarlugu ippassaq aalajangerpaa.
Tamatuma saniatigut katersugaasivimmi suleqataata pisortap Great Greenlandimit pisiumajunnaarnissamut kaammattuinermik Facebookikkut saqqummersitaq ’like-ersimavaa’. Jim Lyngvildip Ilulissani Eqqumiitsulianik Katersugaasivimmi saqqummersitsinissani maanna taamaatiinnarpaa.
AAMMA ATUARUK Soraarsitsisoqarnerata kingorna: Jim Lyngvild Ilulissani katersugaasivimmi saqqummersitsiniarunnaartoq
Taassuma ”katersugaavimmi saqqummerserusukkunnaarluni” KNR-imut oqaatigaa.
Immikkut ilisimasalik SMS pillugu: Minnerpaamik ingerlatsinermi ileqqorissaartuliornerunngilaq
Illuatungeriinnik tusarniaaneq sunaana?
Namminersorlutik Oqartussani kommunimiluunniit atorfeqaruit sulisitsisuit atorfeqarninnik unitsitsinnginnermini imaluunniit soraarsitsinissamik aalajanginnginnermini illuatungeriinnik tusarniaaviginissat pisussaaffigaa.
Illuatungeriinnik tusarniaaneq sulisitsisup aalajangerneranut immaqa allannguissutaasinnaasunik ilinnit paasissutissiisoqarnissaanut periarfissiissaaq.
Sulisitsisut tunngaviusumik ilinnut sulinermut sunniuteqarnerlutsitsisinnaasunik tusarniaavigeqqaarnak aalajangersinnaanngilaq.
Paasissutissarsiffik: sullissivik.gl
Mads Mitchelli soraarsinneqarnera Jim Lyngvildip tupaallaatiginngilaa.
SMS-ikkut allagaq Avannaata Kommuniani pisortaanermit Nick Nielsenimit nassiunneqarpoq. Mads Michellimmi illuatungeriinnik tusarniaaffigineqarnissaanut ulloq ataaseq sioqqullugu Jim Lyngvild Mads Mitchellip marsip naanerani soraarsinneqarnissaanik allassimasumik SMS-imik allagarsivoq.
Nick Nielsen SMS-imi allappoq:
Haluu Jim,
Ilisimatitsiviginiarlutit, Madsip marsi ilanngullugu katersugaasivimmiinnissaa siunniukkipput. Taamaalillutit saqqummersitsinermut ammaanermullu atatillugu suleqatigisinnaavat. Taama siunniussuinerput ilisimanngilaa. Taamaammat tamanna uagut akornatsinniiginnassaaq. Tassani ajornakusoortumik, kikkut tamarmik naammagisimaarsinnaasaattut neriuutigisannik, pisoqassaaq. Inuss. Nick
Mads Mitchellip eqqumiitsulianik katersugaasivimmi atorfeqarnini sivitsorneqarnavianngitsoq ilisimanngikkaa Jim Lyngvild SMS-ikkut paasitinneqarpoq.
KNR-ip Nick Nielsen atorfeqartumut tunngatillugu Jim Lyngvildimut allagaqarnerani kukkusoqarnersoq Arctic Lawimi eqqartuussissuserisoq piginnittorlu Britta Keldsen naliliisippaa.
AAMMA ATUARUK Katersugaasimmi aqutsisoq Jim Lyngvildip saqqummersitsinissaanik aaqqissuussisoq soraarsitaasoq
Taassumalu naliliinera ersarippoq:
- Minnerpaamik ingerlatsinermi ileqqorissaartuliornerunngilaq. Pisortaanerup inunnut ataasiakkaanut tunngatillugu nipangiusimasussaatitaanini unioqqutillugulu inummut paasissutissanut inatsit aamma unioqqutippaa, Britta Keldsen oqarpoq.
Avannaata Kommuniata illuatungeriinnik tusarniaasoqanngitsorluunniit Mads Mitchellip soraarsinneqarnissaa aalajangereersimagaa eqqartuussissuserisup aamma maluginiarpaa:
- Illuatungeriinnimmi tusarniaanermi soraarsitsisoqarnissaanik isummersimanermik allannguisinnaasumik nutaanik paasissutissaqalersinnaavoq. Sioqqullugu aalajangeereersimagaanni sulisoq tusarneqarnissamut periarfissaajarneqassaaq, tamannalu suliamik isumaginninnermut inatsimmik unioqqutitsineruvoq.
Nick Nielsen Britta Keldsenip naliliineranut tunngatillugu oqaaseqarniarnani KNR-imut allappoq.
Kommunimi pisortaaneq SMS pillugu nipaattoq
KNR-ip kommunimi pisortaaneq, Nick Nielsen attaveqarfigalugu kommunimi pisortaanertut inunnut kommunip avataaniittunut sulisup atorfeqarneranut tunngasunik SMS-ernissaq ajunnginnersoq apeqqutigaa.
Nick Nielsenilu tassunga ima akivoq:
- Tassungarpiaq oqaasissaqanngilanga.
Sooruna?
- Suliamut tassunga tunngasut nalinginnaasumit ilarussuunnerupput.
Ataqqinnikkaluarlunga kisianni takusinnaavarput suli taanna ilarussuuteqanngitsoq. Madsip soraarsinneqarnissamik ilisimasaqannginnerani SMS-erlutik allamut tamanna oqaatigivat.
- Suliap qanoq issusia qiviaraanni ilarussuussimasortaqaqigami.
Uani suliaq oqaluuserinngilarput. Kommunip avataani inummut sulisup soraarsinneqarnissaanik oqaaseqarsimanerit oqaluuseraarput. Tamanna ajunngila imaluunniit?
- Oqaasissaqanngilanga.
Ilulissani kulturikkut illorsuup Jim Lyngvildip saqqummersitsinissaa isumagisussanngorpaa, Ilulissani innuttaasut taamaalillutik sulianik takunnissinnaassallutik. Saqqummersitat nunarsuup sinneranut saqqummersinneqarnissaat tamatuma kingorna pilersaarutaavoq.