Soraarsitsisoqarnerata kingorna: Jim Lyngvild Ilulissani katersugaasivimmi saqqummersitsiniarunnaartoq
Puisit amiinit ilusilersukkanit assilisanik Ilulissani eqqumiitsulianik katersugaasivimmi saqqummersitsisoqanngiinnassaaq.
Suliami eqqumiitsuliortoq, Jim Lyngvild KNR-imut oqarpoq.
Taanna Danmarkimiit Ilulissanut ualimut tikippoq, taassumalu eqqumiitsulianik katersugaavimmi pisortaq soraarsinneqarsimasoq, Mads Mitchell oqaloqatigeqqammerpaa.
- Anorersuartumut tikippunga. Katersugaasivimmimi maannakkut saqqummersitsisinnaanngilanga, Jim Lyngvild oqarpoq.
AAMMA ATUARUK Katersugaasimmi aqutsisoq Jim Lyngvildip saqqummersitsinissaanik aaqqissuussisoq soraarsitaasoq
Mads Mitchell Avannaata Kommuniani sulisitsisuminit soraarsinneqartoq akunnialuit matuma siorna saqqummersinneqarpoq.
Kommunip oqarnera naapertorlugu soraarsinneqarnera suleqatigiinnermi ajornakusoortoqarneranik pissuteqarpoq, Mads Michellilli saqqummersitsinissamik oqallittoqangatsiarnera pissutaanerarpaa.
"Ilungersuutigingaatsiarnikuuakka"
Assit pillugit maanna qanoq pilersaaruteqartoqarpa?
- Pilersaarut imaappoq – assiutikka sanasorlu maani Ilulissani najugaqartoq peqatigalugu maaniipput. Assit maanna sinilersussavakka. Ilaat 2 meterinit 3 meterinut takissuseqarput, taamaammat angisoorujussuupput, Jim Lyngvild oqarpoq.
- Apummik qaleriiaattuliussalluta oqaluuseraarput, taamaalilluta arfininngorpat qimussimik sukkasiuttoqalerpat saqqummersissallugit. Aamma imaassinnaavoq illoqarfimmi arlaanniluunniit nivinngaasugut. Tamanna paasinarsissaaq, eqqumiitsuliortoq oqarpoq.
AAMMA ATUARUK Inuit aqqusinermi naapitatta isumagaat assigiinngitsut: Lyngvildip assilisai ilaasa akerlerigaat ilaasa ajorinngilluinnarpaat
- Maannakkut assit qanoq takutinneqarnissaanut aaqqiissutissarsiussaagut – saqqummersinneqassappummi. Assit piniartunut Kalaallit Nunaannullu nersorinninnerupput. Taamaammat poortuinnarlugit takutinnagillu angerlaateqqissagukkittamanna alianassaaq.
Assit takutinnissaat sooq ilinnut pingaaruteqarpa?
- Assit ilungersuutiginikuuakka. Isumassarsiungaatsiarnikuuvunga. Anguniagaqarlunga sammiveqanngitsumiinnikuuvunga. Isornartorsiorneqaqattaarnikuuvunga, taamaammat tunniutiinnassaguma tamanna uggornartorujussuussaaq. Taamaammat arlaat isumassarsiaqaruni takkulli, Hotel Icefjordimi matunnut kasuttoriartorit. Atuarfik, inersuaq, bussit unittarfiat, suugaluarpalluunniit soqutaanngilaq. Saqqummersinneqarunik naammappoq.
"Uumasuutikka qaasuttut takusigit, pilersitakka takusigit"
Jim Lyngvild pillugu oqallinneq februaarip qitequnnerani aallartippoq. Maanna soraarsinneqarsimasup eqqumiitsulianik katersugaasiviup aqutsisuata Mads Mitchellip saqqummersitsisoqarnissaa piumasaraa. Taanna decembarimi atorfimmini atorfeqalerpoq, saqqummersitsiviunngiffiusorpassuillu nalaappai.
Mads Michellip kalaallit eqqumiitsuliortut katersugaasivimmi saqqummersitserusussinnaasut qulit tikillugit attveqarfigai, taakkuli piffissap taama sivikitsup iluani periarfissaqarlutik piumasimanngitsut, taassuma KNR-imut oqaatigaa. Jim Lyngvildilu "puisit amiinit nuannarisaqartuummat" attavigaa.
Eqqumiitsuliat saqqummersinneqartussaagaluartut ilaat.
Jim Lyngvild soqutiginnippoq, puisillu amiinik ilusilersukkanik kalaallinit assilitittartunit atorneqartunik pinngortitami assiliivoq. Assilisittut assini arlalinni uumasutut soorlu uumasoq immap killingani puisit amiinik atisalianik atortutut ilusilersugaapput.
Oqallinnerli aallartippoq. Kalaallit ilaasa Jim Lyngvildimik toqqaaneq assinilu najoqqutarineqartoq nuannarinngilaat.
Klaudia Petersen taakku ilagaat.
- Aasiit allamioq sinnerluta saqqummerpoq. "Uumasuutikka qaasuttut takusigit, pilersitakka takusigit. Uangana nuna piga uangaana kalaaliutikka". Uatsinnik piginnittutut pissuseqarluni takutitsivoq, Klaudia Petersen KNR-imut oqarpoq.
Kalaallip eqqumiitsuliortup assit suliarisimassagaluarai taanna isumaqarpoq:
- Kulturerput tarnikkullu kinaassuserput asuli pisassaanngilaq, piumasaannarmik isummersorfissatut saqqummersitassaanngilaq.
Great Greenlandimit pisiumajunnaarniartut
Oqallinneq ullut tallimat missaat qaangiuttut Great Greenlandimit puisit amiinik pisiumajunnaarnissamut atsiornernik katersineq Facebookikkut siammarterneqarluni februaarimi sapaatit akunnerisa naanerini kingullermi aallartinneqarmat annertunerpaalerpoq.
Inuit puisit amiinik atisalianik, taskilianik aaqqasianillu atorlutik assingi ikkussuunneqalerput. Great Greenlandimiimmi pisiumajunnaartoqarpat - nunarput nammineq akiliuteqartuussaaq, piniartummi puisit amiinik Great Greenlandimut tunisisarput, tamannalu aningaasarsiutigalugu.
Mads Mitchell Ilulissani katersugaasivimmi aqutsisuusimasoq. Nammineq assiutigineqartoq.
Eqqumiitsulianik saqqummersitsineq sapaatiuppat ammartussaagaluarpoq. Tassanili saqqummersitsisoqarniarunnaarpoq. Mads Mitchellimi Ilulissani katersugaasivimmi aqutsisuusoq sulilernerminit qaammatit pingasut sinnernagilluunniit ullumi soraarsitaavoq.
Avannaata Kommuniani pisortaanerup, Nick Nielsenip soraarsitsineq inummut tunngassuteqartuunerarpaa - tamannali saqqummersitsinissamut attuumassuteqannginnerarlugu KNR-imut oqaatigaa.
Mads Mitchellilli tamanna upperinngilaa. Taassuma Jim Lyngvildip assilisaanik saqqummersitsinissamut atatillugu kommunimi aqutsisup ataatsip namminerlu akornimminni aaqqiagiinngissuteqartoqarsimanera nassuerutigaa.
Mads Mitchellep kommunimi aqutsisup Jim Lyngvildimut suliaanillu akerlerinnittunik arlalinnik like-erisimasoq takusimallugu paasisimmallugu oqaloqatigimmagu aaqqiagiinninneq aallartissimanerarpaa.
KNR-ip assit aqutsisup nuannarinninnani Facebookikkut like-erisimanerinut uppernarsaatit takuai.
