Inuit aqqusinermi naapitatta isumagaat assigiinngitsut: Lyngvildip assilisai ilaasa akerlerigaat ilaasa ajorinngilluinnarpaat
Inoqatinut attaveqaatini aamma nunatsinni nunanilu allani tusagassiuutinilu nalinginnaasuni ulluni kingullerni oqallittoqangaatsiarpoq. Oqallinneq danskip ilusilersuisartup, Jim Lyngvildip assilialiaanut, kalaallit puisit amiinik atisaliaanut assigiinngitsunik imaqartunut tunngassuteqarpoq.
Oqallinnermi assi una ilaatigut kamaatigineqarpoq. Assi: Jim Lyngvild
Jim Lyngvild assilisat pillugit ammip qalipaataanik assigiinngisitsisutut, aamma kalaallit kulturianik innarliisutut ilaatigut taagorneqarpoq.
KNR-ip inuit assit oqallisaangaatsiartut pillugit qanoq isumaqarnersut paasiniarlugit apersorpai
Assi: Bibi Nathansen/KNR
63-inik ukiulik, Anna Olsen:
- Aalassappunga takugakkit. Nuannarinngilakka. Kisianni soorunanalimi eqqumiitsuliortut ataqqivakka, kisianni isumaqarpunga nunatsinni kusanartuutivut taamatut takutittariaqanngitsut.
Sooruna?
- Eriagisassaagamik uagut pigisagut soorlu kalaallisuut allallu. Isumaqatiginngingaarakku ajoraluartumik
Inuit ilaasa aalassassutigisinnaagaat paasisinnaaviuk?
- Iija, paasilluarsinnaavara. Misigissutsinut tunngasorujussuusaramik tamakkua. Aalassarrattarpugut - immaqa affaata ajorivaat, affaasa ajorinngilaat. Taama immaqa oqartoqarsinnaavoq.
AAMMA ATUARUK Assit aalassassutaasut: Jim Lyngvild Ilulissani saqqummersitsinissaminut nangaalerpoq
Qanoq misigissutsitigut aalassappit?
- Nassuerutigissavara kamakkama. Kisima angerlarsimagama qujanaqaaq. Pissutigalugu assit nunanut allanut takutinneqartussaapput, taava qanoq eqqarsassappat? Ilisarisimanngilaatigut danskit aamma ilisarisimanngilaatigut. Qanoq kalaallisuunik atuisarnersugut naluaat, taamaammat uku takugunikkit immaqa taama atikkersortartugut eqqarsassapput.
Qallunaap ilusilersuisartup sanaarivai. Tamanna assinut isummerninnut allannguiva?
- Allannguinngikkaluarpoq, kisianni eqqumiigivara sooq Great Greenland nunatsinneersunik atorsimanngitsut. Eqqumiigisorujussuuvara, pikkorissorsuit nunatsinni takutitsilluarsinnaasut amerlaqigamik.
Uku assit kalaallit kulturiannut atornerluisutut isornartorsiorneqarput. Illit isummanni kalaaliunngitsut imatut assimik suliaqarsinnaatitaassappat?
- Tassaqa. Kalaallit sanaavinut iluamik takutitsisinnaanngillat immaqa kalaaliunngikkunik. Pitsaanerussagaluarpoq kalaallinik ikiorteqarsimasuugunik. Kalaallit sanasimasuuppassuk immaqa.
Assi: Bibi Nathansen/KNR
30-nik ukiulik, Rebecka Alban:
Assi uku Jim Lyngvild assilisai - ilinnut aalassatsitsippat?
- Assit kusanarluinnarsoraakku, puisip amiata atorneqarnera kalaallillu kulturita ilaanera torragaara.
Ulluni kingullrni oqallittoqangaatsiarpoq - aalassatsinneqarnerat paasisinnaaviuk?
- Oqallinnermi malinnaavallaanngilanga, kisianni Jim Lyngvildip Instagramimi quppernera malinnaaffigaara, taannalu asserpassuarnik ikkussuisarpoq, oqallisigineqalersinnaalluarsoraaralu. Nutaamimmi pilersitsinerulluinnarlunilu nutaamik eqqarsarneruvoq, tamatumali saniatigut aamma qangarpalaarluni.
Qallunaap ilusilersuisartup sanaarivai. Taanna qallunaanngikkaluarpat assinut isummernerit allaanerussagaluarpa?
- Naamik, taama isumaqanngilanga. Suliarisai tamarmik kusarluinnartuusoraakka.
Kalaallit kulturiat atornerlunneqartoq oqallinnermi ilaatigut taakkartorneqarpoq. Kalaaliunngitsumillu assit saqqummersinneqarnerat ajunnginnersoq taanna aperaarput?
- Aap, taama isumaqarpunga. Oqareernittuut assit kusanarput, isumaqarpungalu kulturit marluk atorneqarfissaminnut atorneqassasut. Uanga taama isumaqarpunga, Rebecka Alban oqarpoq.
Assi: Bibi Nathansen/KNR
68-inik ukiulik, Amos Nielsen:
Assit ilinnut aalassannarpat?
- Naamik, uanga alutorivakka. Kusassaallaqqeqaaq, aamma ulluinnarni atorneq ajoramik. Pikkoreqaaq. Ajorinngilakka.
Inuit ilaasa aalassassutigisinnaagaat paasisinnaaviuk?
- Suu, tassami isummagut assigiinngitsuugamik. Imaassinnaasoq tamakkuliortartut nalulaariaramik pikkorinaarlugu pigaat. Pikkoreqaaq.
AAMMA ATUARUK Jim Lyngvild Great Greenlandip atisaliaanik nittarsaassivoq
Qallunaap ilusilersuisartup sanaarivai. Tamanna assinut isummerninnut allannguiva?
- Qallunaap ilusilersugarivaa, kisianni nunatsinninngaanniit isumassarsiaasuuguni soorlu nuannernerussagaluartoq. Una qallunaatut takorluuisutut ittoq. Aamma nalunavianngikkaluarpaa taama ittunik atorneq ajortugut.
Uku assit kalaallit kulturiannut atornerluisutut isornartorsiorneqarput. Illit isummanni kalaaliunngitsut imatut assimik suliaqarsinnaatitaassappat?
- Taama oqartoqarsinnaavoq.
Sooruna?
- Uagut inuit, ingammik uanga ilitsoqqussakka nunaqarfimmi peroriartorama taama ittunik atisanik takunngisaannarpunga.
Assi: Bibi Nathansen/KNR
61-inik ukiulik, Emma Petersen:
Uku assit ilinnut aalassannarpat?
- Naamerluinnaqqissaaq. Nutaaliatut sanaajupput, pissanganartuupput, qalipaatigissaaqaat. Aammalu inuttaata sanasup torrallassimaqai.
Inuit ilaasa aalassassutigisinnaagaat paasisinnaaviuk?
- Naamik, paasisinnaanngilara una pissutigalugu sanariaasiat katiterneralu assut kusanarput. Kusanaqaat, eqqarsaatigilluarlugillu suliarujussuusimapput.
Qallunaap ilusilersuisartup sanaarivai. Tamanna assinut isummerninnut allannguiva?
- Allanngortitsinngiivippoq. Kalaallit qallunaallu qangali atasuugamik eqqarsarpunga soqutaanngitsoq kiap sanaarinerai.
Uku assit kalaallit kulturiannut atornerluisutut isornartorsiorneqarput. Illit isummanni kalaaliunngitsut imatut assimik suliaqarsinnaatitaassappat?
- Ila ila. Taama aamma kalaallit ujaarlillaqqitsigisut. Angumasinnaarujussuarpaat aamma. Eqqarsarpunga iserfigigaanni eqqarsaatit sanaassat amerlasuut takkussuussinnaasarput.
