Kalaaleq arnaq nunat tamalaat pinnerneqqusaanneranni Miss Grand Internationalimi ukioq manna peqataavoq
Miss Grand International Thailandimi Cambodiamilu pisussatut aaqqissuunneqartumi maanna Naja Mathilde Rosing 26-inik ukioqartoq arnat allat nunanit tamalaaneersut tassani unammissavai.
Siullermeerluni Kalaallit Nunaat sinnerlugu pinnerneqqusaanermi peqataassaaq, pinnerneqqusaannermulli misilittagaqareerpoq.
Danmark sinnerlugu pinnerneqqusaannermut Miss Intercontinentalimut Egyptenimi pisumut siorna ilaatigut peqataavoq. Tusagassiuutinut nalunaarummi oqarpoq nunani sinnerlugu peqataanissani qilanaaralugu.
- Nunaga sinnerlugu peqataasinnaanngorpunga. Sapinngisaralu tamaat ajunngitsuliornissara siunniuppara, taanna oqarpoq.
Pinnerneqqusaattoqannginneranili nalilersorneqareerpoq
Pinnerneqqusaannissaq sioqqullugu nalaanilu oqalloriissutsikkut, iliuuseeqarfigerusutatigut, saqqummiussisinnaassutsikut, piginnaasatigut, angusaqarusutsikkut kinaassutsikkullu saqqummernikkut peqataasussat tamarmik nalilersorneqartarput. Soorlu aamma ajunngitsuliorniarnerni peqataaffigisatik aamma nalilerneqatigissagaat.
- Inuit kinguaassiutitigut atornerlunneqarsimasut, pinngitsaalineqarsimasut, qanigisamit atornerlunneqarsimasut, allatigullu atornerlunneqarsimasut ajunngitsuliorniarninni pingaarnerpaatippakka, atornerlunneqarsimasut siumut isigalutik neriullualersinnissaat pingaartillugu, pingaartumik meeqqat inuusuttullu kingunerluuteqarsimasut, ilaatigut allappoq.
Tapersersorneqqarnissamut pisariaqartitsineq
Pinnerneqqusaannermi angusaqarluarnissaminut - ajunngitsuliorniarnermut anguniakkaminik angusaqarniarnermini nunagisamit tapersersorneqarneq Naja Mathilde Rosingip pisariaqartippaa. Tapersersortissanillu pissarsiniarneq ajornaatsuinnaanngilaq, tusagassiuutinut nalunaarummini allappoq. Allaat sapernarluinnangajalluni.
Nuuk Couture tassatuaavoq suliffeqarfik tapersersuiniartoq.
-Nunarujussuarmi innuttakeqisumi najugaqarluni ilagisatsinnik tapersersuiniarnermi immikkoortitsinissaq siunissaqanngilaq. Kalaallit Nunaat tamarmi Naja Mathildep iliuuseqarneratigut saqqummiunneqarpoq - tamannalu tulluusimaarutigisariaqarparput, suliffeqarfiup pisortaa Louise Lynge Berthelsen oqarpoq.
Kalaallisoorluni oqalugiareerpat Miss Grand Internationalimi pinnerneqqusaannermi oktoberip 25-iani aalajangiunneqassaaq ajugaassanersoq.
