Politiit toqutsisoqarnerata kingorna Nuummi toqqissisimasinnaaneerarpaat
Politiit angut 20-nik ukiulik Nuummi toqungasoq tallimanngormat nassaarineqartoq pillugu suliamut nutaanik paasissutissaateqanngillat.
Innuttaasulli toqqissisimasumik illoqarfimmi angallassinnaasut erseqqissaassutigaat.
- Illoqarfimmi toqqissisimanngittoqarnissaanut pissutissaqanngilaq. Inuit illoqarfimmi toqqissisimasinnaapput, Kalaallit nunaanni Politiini politikommissæri, misissueqqissaarnermilu aqutsisoq, Malik Sandgreen oqarpoq.
25-nik ukiulik tigusarineqartoq
Politiit angut 25-nik ukiulik toqutsisimasutut pasineqartoq arfininngornermi tigusaraat. Angut sassartinneqarpoq ullunilu 25-ni tigummigallagassanngortinneqarluni. Eqqartuussisoqarfik Sermersuumi sassartitsinermi matut matoqqatinneqarput, Malik Sandgreen taamaammat sassartitsinermi qanoq pisoqarsimanersoq allamik oqaaseqarsinnaanngilaq.
- Tusatsiakkanik ingerlaartoqartoq nalunngilarput, taakkuali oqaaseqarfigisinnaanngilagut. Tusatsiakkallu ilumoortortaqarnersut ilumoortortaqannginnersulluunniit oqaaseqarfigisinnaanngilarput, Malik Sandgreen oqarpoq.
- Innuttaasulli toqqissisimallutik illoqarfimmi angallassinnaanerat erseqqissaatigerusuppparput, Malik Sandgreeen oqarpoq.
Politiit saqqumilaarnerusut
Pllitiit innuttaasut toqqissisimanerunissaat pillugu illoqarfimmi saqqumilaarnerussapput, politikommissæri oqarpoq. Innuttaasut suliamut atatillugu paasissutissaateqarpata tamanna pillugu politiinut saaffiginninnissamut tikilluaqquneqarput, politiit misissuinerannut atatillugu saaffiginnissinnaallutik.
- Innuttaasut toqungasumut tunngatillugu oktobarip ulluisa aappaata sisamaatalu akornanni takunnissimasinnaasut tusagaqarsimasinnaasulluunniit politiinut saaffiginneqquneqarput.
- Takussutissanik uppernarsaatissanik sapaatit akunnerata naanera tamaat misissuivugut, taassuma saniatigut Blok 5-imi eqqaanilu najugallit nakkutiginnissutinik filmiliuutillit pasinarsinnaasunik immiussaateqarnersut misissoqquneqarpoq, Malik Sandgreen oqarpoq.
Suliamut atatillugu paasissutissaateqaruit Kalaallit Nunaanni Politiinut oqarasuaammut 70 14 48-mut attaveqarsinnaajuaannarputit.
