Politiit ullormut nalunaarutaat: Inuusuttut eqqiaammik qaartartuliortartut
Inoqatinut nittartakkakkut attaveqatigiittarfinni siammarterneqartartumik ilaarsineq Nuummi meeqqat inuusuttullu akornanni atugaaqaaq.
Sodavandip puua eqqiaammik akoorutissalimmik immigaq atorlugu qaartartuliorneq taakkua akornanni atugaangaatsiaqqilersimasoq, Kalaallit Nunaanni Politiit pigaartuisa pisortaat Carl Sværd oqarpoq.
- Qaartoqarpallanneranik sapaatit akunnerata naanerani qasseeriarluta nalunaarfigineqarpugut, inuusuttorlu sodavandip puuanik nassataqartoq tigusaraarput, politiit pigaartuisa pisortaat oqarpoq.
Taamaammat angajoqqaat angerlarsimaffimmi kuuffimmut akoorutissalimmik eqqiaataarussimanerlutik sodavandilluunniit puukuutaarussimanerlutik misissuisarnissaannik politiit kaammattuuteqarput.
Nuummi tillinniartoqartoq
Nuup ilaani Nuukullammi marlunngornermut unnuaani marloriarluni tillinniartoqartoq inuusuttullu pingasut 18-iliineqanngitsut tassa tillinniatsiaannartut tigusarineqartut, politiit pigaartuisa pisortaat ilisimatitsivoq.
- Tillinniatsiaannarlutik tigusarineqartut aqqaneq-marlunnik, 15-inik 17-inillu ukiuliupput, taakkualu tillitaminnik nassataqartut tillinniarfigineqartut marluusut ungasinngisaanni tassa tigusarineqarput, Carl Sværd oqarpoq.
Tigusarineqartut tamarmik killisiorneqarlutillu tillinniarsimasutut unnerluutigineqartut iperagaareersut angajoqqaavinukaanneqareersullu, Carl Sværd aamma oqarpoq.
- 15-ileereersimasortaalli tillinniarsimasutut eqqartuunneqarataannaapput, taamaalisoqassappallu pineqaatissinneqassapput, Carl Sværd oqarpoq.