Nunatsinnut isiginnittariaaseq ilitsersuisup allanngortikkusukkaa
- Kalaallit Nunaat kalaallillu pillugit isummat pigiliutiinnakkat amerlasoorujussuupput. Isiginneriaaserlu taannaajuaannarpoq. Kalaallit Nunaannillu assigiinngiiaarnerusumik isiginneriaaseqalernissamut suleqataarusuppunga, namminersulivinnissamillu oqallinnerup avataanit isigineqarnera aamma allanngortikkusullugu.
Kenneth Sorento taama oqarpoq. Taanna "Kampen om Grønland"-imik atilimmik piviusulersaarusiorpoq.
AAMMA ATUARUK Filmi piviusulersaarut: Inuusuttut piginnaasallit Københavnimi filmfestivalimik ammaasuussasut
- Isumaqarpunga soqutiginarluinnartoq nunarsuarmi qeqertat annersaat, 56.000-iinnarnik inulik, namminersulivikkusuttoq. Tamanna pissanganaqaaq sapiitsuliornerullunilu.
Timitaliillaqqissut
Filmimi kalaallit inuusuttut sisamat nunatsinni arlaatigut allannguerusuttut pingarnertut inuttaapput.
Inuttallu pingaarnerit tamarmik arlaatigut isummaminnik siuaruarteralutik aallutaqartuussasut, ilitsersuisup Kenneth Sorentop pingaartippaa.
- Tassa imaappoq TV-liornermi inuit oqallorissut toqqarneqakkajupput. Kisianni imaanngilaq oqallorissut timitaliillaqqissuusut. Taamaammat namminersulivinnissaq anguniarlugu arlaatigut aallussisut ujartorsimavakka.
Rappertartoq Josef Tarrak inuttat pingaarnerit ilagaat, taassuma Danmarkimut atassuteqarnerput apeqquserpaa. Tarraap musikvideoliaa "Tupilak" 2016-imi saqqummersoq assigiinngisitsineq pillugu oqallititsingaatsiarpoq.
AAMMA ATUARUK Allannguerusuppunga
Taanna arnaatinilu Paninnguaq Heilmann inuit kakiueriaasaannik kiinnamigut kakiortipput. Filmimi aappariit ajortut naaffiitsuusat, soorlu imigissaq sumiginnaanerlu akiorniarlugit ilungersorput. Marluullutik nunatta namminiilivinnissaa kissaatigaat.
AAMMA ATUARUK Udlandet henter inspiration i grønlandsk antiselvmordsprojekt
Namminiilivinneq
Politikeri tusagassiortunngorniarlu Kaaleeraq M. Andersen aamma namminiilivikkusuttoq, Inatsisartunut 2018-imi qinigassanngortittoq inuttat pingaarnerit aamma ilagaat. Taanna isumaqarpoq naalagaaffimmit tapiissutit kalaallinut saammarsaataasut. Isummanilu tusartikkusullugu nunaqarfinnut angalavoq.
Inuttat pingaarnerit sisamaat Tillie Martinussen nutaamik partiiliorpoq. Taassuma Danmarkimut suleqateqarnerput nukittorsarusuppaa.
Nunarput pillugu oqaluttuaq alla uagut sussagatsigu?
Kenneth Sorento naapertorlugu Kalaallit Nunaat pillugu danskit isiginnaagassiliaat allaaserisaalluunniit kalaallinut atugarliortunut tunnganerusarput.
- Uanga kalaallit inuusuttut piumassuseqaqisut inooriaatsimillu, Kalaallit Nunaannut tulluarnerusorisamik, allanngortitserusullutik sorsuuteqartut pillugit oqaluttuarusukkama.
Eqqarsaatit misigissutsillu
Namminiilivinneq namminiilivinnginnerluunniit isummerfiginagu ilitsersuisoq oqarpoq.
- Kalaallit Nunaat namminiilivissanersoq namminiilivissanngitsorluunniit isummerfiginngilara. Paaserusutara uaniikkami: Suunukua eqqarsaatit misigissutsillu tassunga attuumassuteqartut.
Kenneth Sorentop filmi "Kampen om Grønland" ukiuni qulingiluani suuliaa akunnerup aappaata affap missaannik sivisussuseqarpoq. Jørgen Chemnitz filmimi ingerlatseqataavoq.
Filmi nunarsuarmi isiginnaagassiat piviusuinnik tunngavillit pillugit festivalit annersaanni, CPH:DOX-imi Københavnimi Det Kongelige Teaterimi marsip 17-ianni ammaasuussaaq.
Nuummilu Katuami marsip 13-iani takutinneqassalluni.
