VIDEO Suliniut 'Inuuneruna Iggoraarsuk' nunanut allanut saqqummiunneqalersoq

Paninnguaq Heilmannip nunanit allaneersorpassuarnit peqataaffigineqartumi "Inuuneruna Iggoraarsuk" saqqummiuttussanngorpaa.

- Aperineqarnikuuvunga oqaluttuarerusunnerlugu "Inuuneruna Iggoraarsuk" oqariartuutaalu nunanut allanut ingerlateqqikkusullugit, Paninnguaq Heilmann KNR-imut oqarpoq.

RSA, Royal Society of Arts, tassaavoq nunarsuaq tamakkerlugu allannguinissaq anguniarlugu misilittakkanik isumassarsianillu avitseqatigiinnissamut isumasioqatigiiffik. Tassani nittartagaq aqqutigalugu toqqaannartumik isumasioqatigiipput.

- Oqariartuutit siammartinnissaat nunarsuarmut taavalu uanga projektimut sakkussannik aallerusuppunga saqqummiussisussanit allaneersunit. Imaassinnaavoq isumassarsiamik tunigaannga, taamaasilluni maani ingerlateqqissinnaallugu, Paninnguaq Heilmann oqarpoq.