Rusland Ilulissani ataatsimeersuarnissamut suli tikilluaqqusaasoq
Ilulissani nalunaarutip ukiunik qulinngortorsiutigineqarneranut atatillugu, nunat nalunaarummik atsioqatigiissuteqartut nunanut allanut tunngasunut ministerii Issittoq pillugu Ilulissani ataatsimeersuarnissamut qaaqquneqarput.
Russilli kilitsissiarisimasaata Tuluit Nunaanni toqoriaraluarneqarneranut suliamut atatillugu Danmarkip russit diplomatii marluk anisissimavai.
Ruslandilu tamatumunnga qisuariaateqarluni danskit diplomatii marluk Ruslandimit anisippai nunallu akornanni attaveqarneq ajorseriangaatsiarluni, altinget.dk taama allaaserisaqarpoq.
Tamannali Ilulissani ataatsimeersuarnissamut sunniuteqassanngitsoq Anders Samuelsenip naqissuserpaa. Russit nunanut allanut tunngasunut ministeriat Sergey Lavrov suli tikilluaqqusaavoq.
AAMMA ATUARUK Suka Ilulissani ataatsimeersuarnissamut qaaqqusisoq
Danskimmi nunanut allanut tunngasunut ministeriat isumaqarpoq nunat marluusut arlalitsigut aaqqiagiinngissuteqaraluarlutik Issittoq pillugu suliassaqarfik oqaloqatigiissutigisariaqaraat.
- Issittup oqaloqatigiissutiginissaa pingaaruteqarlunilu naleqquppoq. Issittormi akerleriiffiunngilaq, aamma taamaattuaannartariaqarpoq, altinget.dk-mut taama oqarpoq.
Nunat tallimat Ilulissani nalunaarummik atsioqatigiissuteqartut tassaapput USA, Rusland, Canada, Norge kiisalu Danmark, Nunarput tamatumunnga ilaalluni.
Issittumi Siunnersuisoqatigiinni nunat ilaasortaasut allat, Sverige, Finland aamma Island, kiisalu nunap inoqqaavisa kattuffii Issittumi Siunnersuisoqatigiinni peqataasut aamma qaaqquneqarput.
AAMMA ATUARUK Nunanut allanut tunngasunut ministeri Ilulissani ataatsiminniartoq