Nunanut allanut tunngasunut ministeri Ilulissani ataatsiminniartoq

Danskit nunanut allanut tunngasunut ministereqarfiata Issittumi SDG pillugu ullumi ataatsimeersuartitsinerani inuit 250-it peqataapput.

Taakkununnga ilaapput Naalakkersuisunut ilaasortat arfinillit, danskit nunanut allanut tunngasunut ministeriat, Inatsisartunut ilaasortat arlallit borgmesterillu Nunatsinneersut marluk.

SDG tassaavoq Sustainable Development Goals. Naalagaaffiit Peqatigiit nunarsuarmi nunanut tamanut 2030-ip tungaanut anguniagassatut oqaasertaligaat immikkoortut 17-it.

Anguniagassatut allassimasut assersuutigisinnaavagut makkuusut: kaattoqassanngitsoq, piitsoqassanngitsoq, ilinniakkat pitsaasuussasut ilaallu ilanngullugit.

Nunarsuup sinnerani anguniagassat tamakku aamma siunissami Issittumi ineriartornermi sinaakkusiisuussapput.

AAMMA ATUARUK Savalimmiuni naalakkersuisoq issittoq pillugu ataatsimiinnermut takkutinngitsoq

Ataatsimeersuarnermi nunanut allanut tunngasunut ministerip Anders Samuelsenip tamanna erseqqissaatigaa. Ilanngullugulu erseqqissarlugu siunissami ineriartortitsinissami naalagaaffiup suliffeqarfinnik innuttaasunillu suleqateqarnissaata pingaaruteqassusia.

Kalaallit Nunaanni SDG-ip ilanngutsinneqarnissaanut akisussaasoq tassaavoq aningaasaqarnermut naalakkersuisoq Aqqaluaq B. Egede, taassumalu qularinngilaa suliassap allaffissorluni ingerlatsiinnarneqannginnissaa.

Nunarsuarmi tamarmi, Kalaallit Nunaanniinnaanngitsoq ineriartortitsinermik siuarsaanissamut SDG soqutiginartorpassuarnik imaqarpoq. Sanaartornermut, nunamik atuinermut nungusaataanngitsumillu ineriartortitsinermi nunat killeqarfii akimorlugit sakkussaavoq naleqqulluartoq.

Aqqaluaq B. Egedep anguniagassat arlaannaalluunniit pingaarnertut tikkuarusunngilaa, siunissamilu ineriartorfissamik tikkuaarusunnani.

- Sutigut tamatigut ineriartorfiusariaqarpoq. Suliat aalajangersimasut aningaasaqarnermut naalakkersuisumut soqutiginarsinnaapput, taamatullu isumaginninnermut naalakkersuisumut. Taamaattumik tamatta ataatsimoorluta suliassarpassuaqarpugut, Aqqaluaq B. Egede naggasiivoq.

Ataatsimeersuarnermi nunanut allanut tunngasunut ministerip Anders Samuelsenip suliniutissani tigussaasuni taasaa tassaavoq Issittumi paaseqatigiinnissaq anguniarlugu Ilulissani isumaqatigiissutip ukiunik qulinngortorsiornerani Ilulissani maajimi 2018-imi ataatsimiinnissaq.