Suka Ilulissani ataatsimeersuarnissamut qaaqqusisoq
Nunanut allanut naalakkersuisoq Suka K. Frederiksen danskillu nunanut allanut ministeriat Anders Samuelsen Ilulissani nalunaarutip ukiunik qulinngortorsiorneranut atatillugu Issittoq pillugu Ilulissani ataatsimeersuarnissamut qaaqqusipput. Qaaqqusat tassaapput nunat sisamat nunanut allanut ministerii, Danmark peqatigalugu 2008-mi nalunaarummik atsioqatigiissuteqartut, tassaasut USA, Rusland, Canada aamma Norge.
Issittumi Siunnersuisoqatigiinni nunat ilaasortaasut allat, Sverige, Finland aamma Island, kiisalu nunap inoqqaavisa kattuffii Issittumi Siunnersuisoqatigiinni peqataasut aamma qaaqquneqarput.
AAMMA ATUARUK Nunanut allanut tunngasunut ministeri Ilulissani ataatsiminniartoq
Ilulissani 2008-mi nalunaaruteqarnermi nunat tallimat imminnut pisussaaffilerput aaqqiagiinngissutaasinnaasut isumaqatigiinniarnikkut aaqqiissuteqarfigineqartassasut. Tamatumunngalu peqatigitillugu nunani tamalaani oqallittarfinni suliniutaasut avatangiisinillu illersuinerup, ujaasisarnerup imaanilu isumannaallisaanerup suleqatigiissutigineqarnerat nukittorsarneqarput.
Ukioq manna ataatsimeersuarnermi nalunaarutip ukiunik qulinngortorsiornera malunnartinneqassaaq, tamannalu ilaatigut Peter Taksøe-Jensenip Danmarkip nunanut allanut sillimaniarnikkullu politikkia pillugu nalunaarusiaani, Taksøep nalunaarusiaanik aamma taagorneqartumi, inassutigineqartut ilagaat.
AAMMA ATUARUK Issittumut tunngasut uani atuakkit
- Nunat issittup imartaanut sineriaqartut katersuutsinneqassapput nalunaarutillu atuutilersinneqarnera killiffissiorneqassaaq sillimaniarnerlu pillugu politikkikkut suleqatigiinnermut killiliussat nukittorsarnissaannut pisariaqartitsisoqarnersoq oqaluuserineqarluni, Peter Taksøe-Jensenip inassutigisaa taama oqaasertaqarpoq.
Ataatsimeersuarneq Ilulissani maajip 23-ani pissaaq. Nunat allat nunanut allanut ministerii peqataassanersut suli nalunarallarpoq.
