Royal Greenlandip pissakinnerusut juullimi ikiorai

Aalisartut Royal Greenlandimut tunisisartut tamarmik aamma nunatsinni nunaqarfinni illoqarfinnilu Royal Greenlandip tunisassiorfiini sulisut tamarmik juullimi puunnattaassaannik pajunneqarput. Juullimi puunnattaat katillugit 3666-it agguaanneqarput.

Qasigiannguanili tunisassiorfimmi juullimi puunnattaassat agguaassassat sinneqarmata juullimi puunnattaat 20-it illoqarfimmi ilaqutariinnut pissakinnerusunut tunniunneqarput.

- Juullimi puunnattaat 20-it decembarip 23-iani Qasigiannguani inunnik isumaginnittoqarfimmut tunissutigaavut. Tassani sulisut ilaqutariinnut pissakinnerusunut aammalu utoqqarnut atorfissaqartitsisunut juullimi puunnattaat agguaappaat, Qasigiannguani Royal Greenlandip tunisassiorfiani ingerlatsisoq Hans Grønvold suliffeqarfiup nittartaguaanut oqarpoq.

Puunnattaanik pajutsittut nuannaarsimaqisut oqaatigineqarpoq. 

- Decemberip 23-iani juullimi puunnattaat ilaqutariinnut pissakinnerusunut utoqqarnullu agguakkatsigit nuannaarutaaqaat, aamma pajunneqartut qujamasoqaat, Qaasuitsup Kommuniani Qasiginannguani fuldsmægtigi Marie Johansen Royal Greenlandip nittartagaanut oqarpoq, nangillunilu:

- Aamma uagutsinnut nuanneqaaq juulliaraq aqaguttoq juullimi puunnattaanik agguaassisinnaagatta. Taamaattumik aamma uagut Qasiginnguani Royal Greenlandip pajuguteqarneranut qujavugut.

Juullimi puunnattaaq ataaseq inunnut arfinilinnut naammattunik igaassanik aammalu juullisunnitsunik makkuninnga imaqarpoq: Qeerlutooq ataaseq, puulukimineq siatassaq, rødkålit, mandelit, suaasat qaqortut, piskeflødet, kirsebærsause, kaffit aamma mamakujuttut poortat arlaqartut.

Hans Grønvold oqarpoq juullimi puunnattaassat suli sinneqarmata illoqarfimmi efterskole ammaqqeriarpat pajunniarlutik. Utoqqaat illuani najugaqartut aamma puunnattaat nuannaarutigisinnaassagaat Grønvold oqarpoq.