Oqallinneq: Najugaqartut upalungaarsimanermut ilaatinneqassappat?

Nunavummiut akerlianik nunarput innuttaasunik upalungaarsimasuuteqanngilaq. 

Naalakkersuisullu aaqqiissutissarsiorput. 

Issittumi Sakkutooqarfimmit, danskit sakkutuuinut eqqaanarsinnaasumik, ilinniartuutiminninngaanniit sillimasuutitaqalernissamik eqqarsaateqartoqarpoq.

Aamma Canadami sillimasuutitat (Canadian Rangers) isumassarsiffigineqarlutik nunatsinni sillimasuutitaqalernissaa (Greenland Rangers) eqqartorneqarpoq. 

Tamanna pillugu Napa nuummiut katersortarfimmi sapaatip akunnerata siuliani oqallitsitsivoq. 

Tassani upalungaarsimanermut naalakkersuisup Iddimanngiiu Jensen Biancop (IA) naalakkersuisut innuttaasunik upalungaarsimasoqalernissaa ukkatarigaat oqaatigaa. 

- Ajornartorsiutaavoq ukiuni kingullerni eqqartorsimasarput. Suliassaqarfik suliarineqarpoq aamma nunat allat isumassarsiorfigaagut. Naalakkersuisunut soqutiginartorujussuuvoq, naalakkersuisoq oqarpoq. 

Upalungaarsimanermut naalakkersuisoq Iddimanngiiu Jensen Bianco (IA) oqallinnermi peqataavoq. Issittumilu sillimasoqalernissaanut (Rangers) nalunaarusiortoqarnerarlugu. Assi © : Markus Valentin / KNR

Nunavummiit misilittakkat

Nunatsinni politiit SAR-imik annaassiniarnissanut akisussaasuupput. 

Air Greenlandip SAR-imik annaassiniartartui ilisimaneqareersut saniatigut Qamutit SAR Nuummeersut piumassutsiminnik annaassiniartartuupput. 

Taamaakkaluartoq sinerissami taamaattunik annaassiniaasartunik aaqqissuussaqanngilaq, Nunavummili peqarpoq. 

Patrick Abrahamsen ulluinnarni Air Greenlandip SAR-imik annaassiniartartuini kivitsissutilerisuusoq oqallinnermi aqutsisuuvoq. Tassani Canadamiit Calvin Pedersen Nunavummi nunatsinnilu upalungaarsimanikkut assigiinngissutsit pillugit oqaloqatigaa.  Assi © : Markus Valentin / KNR

Calvin Pedersen kinguaariinni pingajuulluni Nunavummi Canadian Rangeriuvoq, tassa piumassutsimik sillimasuuvoq. 

Taassuma Canadamiut politiivi SAR-imik annaassiniarnernik aqutsiunnaarnikuusimanerarpai. 

Nunavut Emergency Managementimili piumassutsimik annaassiniartartut, soorlu nammineq, annaassiniarnermut qulimiguulinnik timmisartunillu attartorsinnaallutillu najugaqartunik ujaasisitsisinnaapput. 

Politiit akisussaasuuneranni Canadamiut politiit inuusuttut tikikkaangamik najukkamiittunit ilisimasaqarnerusorisarnerat ajornartorsiutaavoq.

- Inuusuttut kujataaneersut suliffimmi ingerlaqqinniarlutik maanngartarpugut, kisianni misilittagaqarneq ajorput. Taamaammat naak najukkami ilisimasaqanngikkaluarlutik politiitut allagartatik takutillugit inuit aqunniarsarisarpaat, Calvin Pedersen oqarpoq.

- Tamanna qaangiutereerpoq, pissutigalugu maannakkut akisussaaffeqarpugut.

Lars Borris Pedersenip (saamerleq) Qamutit SAR-imi aqutsisuusup annaassiniarnermik suliassaqartillugu Kalaallit Nunaanni Politiinit sianerfigineqartalersimanertik oqaatigaa. Danmarkimi politiit misilittagaqanngitsut aqutsisuuniarsarinerat pillugu ukiut arfineq-marluk matuma siorna ajornartorsiutaasarsimavoq. Assi © : KNR/Johansinnguaq Olsen

Lars Borris Pedersen Qamutit SAR Nuummeersoq Danmarkimi politiineersunik assingusunik misigisaqarnikuuvoq. Tamannali ukiuni kingullerni arfineq-marlunni allanngorpoq.

- Politiit sumiiffimmi immikkut ilisimasaqartunik pissaqarlutik ilisimatinneqarnikuupput. Taakku uagutsinnut sianerlutik suliaqaqqusisarput, taakkulu tunuliaqutaaniillutik uagutsinnit paasissutissanik pissarsisarlutik.

Nunavummili suleqatigisanut sanilliullugit Qamutit SAR-imi nammineq kajumissutsiminnik suliaqartartut sillimmasigaanngillat, tarnip pissusianik ilisimasalimmik ikiorneqarsinnaanngillat, imaluunniit qulimiguulimmik annaassiniartussamik umiatsiamilluunniit aggersaasinnaanatik.

- Qimusserput aseroruni, imaluunniit ajoquserutta imminut isumagisussaavugut. Nammineq napparsimmaviliartarpugut, imaluunniit tarnimut tunngasunik suliassaqarutta ikiorneqartarluta, Lars Borris Pedersen oqarpoq.

Kalaallit inuiaqatigiinni upalungaarsimasut

Issittumi Sakkutooqarfiup pisortaa, generalmajor, Søren Andersen oqallinnerup immikkoortuata aappaanut tapersiivoq.

Upalungaarsimaneq naalakkersuisut akisussaaffigigaat taassuma erseqqissaatigaa. Taamaattoqaannassasorlu oqaatigalugu.

Issittumi Sakkutooqarfiup pisortaata, Søren Andersenip sakkutooqarnermi suliaqarnerit tamarmik Issittumi upalungaarsimanermut ilaapput, taakkulu ajornartoornerni atulersissinnaavai. Tamanna ukiumut ataasiartumik marloriartumilluunniit pisuusaartinneqartartoq, taassuma oqaatigaa. Assi © : Victoria Julie Schou / KNR

Naalakkersuisut ajutoortoqarillugu ikiuussinnaasunik sinerissami nammineq kajumissutsiminnik suliaqarsinnaasunik pilersitsissappata tamanna Issittumi Sakkutooqarfimmut aamma iluaqutaasinnaavoq.

- Inuinnaat eqqortunik isumalluutissaqartariaqarput, uangalu sakkutooqarnikkut atortunik eqqortunik qanoq pitsanngorsaasinnaanermut sungiusarneqartariaqarlunga, Søren Andersen oqarpoq.

- Najukkami sungiusarsimasunik peqarnissaq eqqortuusoraara. Naalakkersuisut tamanna suliassaraat. Tassunga peqquneqarutta aamma peqataasinnaavugut.

Søren Andersenip Issittumi Sakkutooqarfimmiinnermini isumalluutinik amigaateqanngisaalluarlutik erseqqissaatigaa. Suliaqarfimmi tassani allat tamanna taperserpaat, isumalluutissaqartuaannarnerarlugulu.

Kunngeqarfik Danmarkip Canada illersornissamut nutaamik februaarimi isumaqatigiissuteqarfigaa. Isumaqatigiissutip Greenland Rangersip pilersinneqarnissaanut atatillugu suleqatigiinneq ilaatigut pitsaanerulersissavaa. Assi © : Markus Valentin / KNR

Greenland Rangers

Naalakkersuisut aamma danskit naalakkersuisuisa Canada illersornissamut februaarimi isumaqatigiissuteqarfigaat.

Isumaqatigiissutip Greenland Rangersinik pilersitsinissamut suleqatigiinneq ilaatigut nukittorsassavaa.

Søren Andersenip taakku pilersinneqassappata pitsaasutut isigaa.

- Tamanna tamanut nukittunerulersitsissaaq. Taamaalilluta nunaqarfinni attaveqarfigisinnaasaqalissaagut. Atortorissaarutinik innaallagiaqanngikkaluarpat atorsinnaasaqassaaq. Taamammat nunaqarfinni piareersimasoqarneq suliniummut sammisaqarnerutitsissaaq.

Issittumi Tunngaviusumik Ilinniarfimmit inuusuttut inuiaqatigiinni nammineq suliaqarnermi kajumissutsiminnik suleqataasinnaasut, Søren Andersen oqarpoq. Tamanna suli aalajangerneqanngilaq. Issittumi Sakkutooqarfiup sillimasuusinnaasunik pilersitsisoqarsinnaanersoq aappaagu aatsaat misissussavaa. Assi © : KNR / Markus Valentin

Issittumi Tunngaviusumik Ilinniarfik tassani pingaaruteqarsinnaasoq, Issittumi Sakkutooqarfiup pisortaa isumaqarpoq.

- Inuusuttut allarluinnarnik misilittagaqarlutik inuiaqatigiinnut uteqqissapput, soorlu Issittumi ikiueqqaarneq, aputip sisoornerani upalungaarsimaneq, dronik aqutsineq angallatinillu ingerlatsineq.

- Najukkani inuiaqatigiit akiuussinnaassuseqarnerulersissavaat. 

Issittumi Sakkutooqarfiup nunatsinni nunagisami illersornissamik suliaqartutut ittunik pilersitsisoqarsinnaanersoq piffissap ingerlanerani oqaluuserineqartartoq Søren Andersenip naggasiutigalugu oqaatigaa.

- Sillimmatitut ittunik Issittumi Sakkutooqarfimmut inuiaqatigiittut suli ilaasunik pilersisinnaanerluta aappaagu misissussavarput. Taakku saaffigisinnaassavagut tamannalu pillugu akilerneqartassallutik.

- Danmarkimi taama aaqqissuussineqarpugut. Tamanna misissussavarput. Inuiaqatigiinni ikittuni attaveqaqatigiiffiusinnaasunik ikiuutaassapput.