Royal Greenlandip nunaqavissunik sulisussarsiniarneq ajornartorsiutigigaa

- Tassa, annertunerpaajusarpoq aasakkut, aalisarneq annertusigaangat. Tassaanilu aamma ilimagilluinnarparput silaginnera iluatsillugu inuit aallarusuttartut, allamukarusuttartut, Royal Greenlandip attaveqaqatigiinnermut pisortaa Jens K. Lyberth, Qanoruumut taama oqarpoq.

Tunitsivinni pingaartumik sulisussaaleqisoqartartoq Royal Greenlandip oqaatigaa, tunitsiveqarfiusumilu sulisussarsisinnaanissaq ilaatigut ajornartorsiutaavoq.

Royal Greenland nunanit allanit tamanna pillugu tikisitsisarpoq, assersuutigalugu Kangianit tikisitsisarlutik:

- Kangianinngaanniit tikisitsinikuuvugut. Inuit 60-it sinnilaarlugit, tunitsivinnilu assigiinngitsuni massakkut sulipput. Taakkua assorujussuaq iluaqutigaavut, Jens K. Lyberth oqarpoq.

AAMMA ATUARUK Sulisussat amigaatigineqartut aaqqiiviginisaanut suleqatigiittoqartariaqartoq

Royal Greenland sulisussanik Nunanit avannarlerneersunik tikisitsisarportaaq, nunatsinni piffissami sivikitsumi suliartortarlutik.

Taassuma saniatigut sulisussanik nunatsinni illoqarfimmit illoqarfimmut nuutsitsisarput, assersuutigalugu 100-t missaat tunitsiveqarfimmit ataatsimit allamut ukioq manna nuunneqarlutik.

Sulisussanillu nunatta avataaneersunik pissarsiniarneq ajornartorsiutaasimanngitsoq, Jens K. Lyberthip oqaatigaa:

- Qujanartumik kommunit, Namminersorlutillu Oqartussat, Danmarkimilu pisortaqarfiit suleqatigilluartorujussuuagut. Taakku pilersaarusioqatigeriarlugit paasissutissat tunniussassavut, soorlu atinik atinik allanillu katersuineq, paasissutissanik piumasarineqartunik, taanna suleqatigiilluarnikkut ingerlalluarpoq, Royal Greenlandimi attaveqaqatigiinnermut pisortaq Jens K. Lyberth taama oqarpoq.

AAMMA ATUARUK Ilaasortatta sulisut 900-t sinnerlugit amigaatigaat

AAMMA ATUARUK Sulisussaaleqineq siuariartornermut akornutaasoq

AAMMA ATUARUK Avataanit suliartortunut inatsit sukaterneqassaaq