Naalakkersuisooqatigiit: Avataanit suliartortunut inatsit sukaterneqassaaq
Nunatsinni suliffeqarfiit aningaasatigut siuariartornerminni sulisutigut amigaateqarnerat annertusinikuuvoq, Namminersorlutik Oqartussat suliffeqarfiutaat, Royal Greenland assersuutigalugu, suliassat ingerlaannartikkumallugit Kangianit fabrikkini sulisussaminnik tikisitsisariaqartarput.
Ukioq kingulleq avataanit nunatsinnut sulisussanik tikisitsisarnermut inatsisit sukaterneri politikerit akueraat, Naalakkersuisooqatigiinnissamullu isumaqatigiissut malillugu inatsisit tassunga tunngasut sukateqqinneqassapput.
- Suliffeqarfiit avataanit suliartortussanik tikisitsiniarlutik qinnuteqaraangamik ullunik 14-inik akissutisinissamut periarfissinneqartarnerat sapaatip akunnerinut sisamanut sivitsorneqassaaq. Siumup, Partii Naleqqap, Atassutip Nunatta Qitornaasalu naalakkersuisoqatigiinnissamik isumaqatigiissutaanni taama allassimavoq.
”Tikisitaq aallaqqittassaaq”
Aammattaaq tikisitap suliani naammassereerunigit aallaqqinnissaa Naalakkersuisooqatigiilertussat kissaatigivaat.
-Tikisitamut suliassatut allanneqarsimasoq naammassigaangat tikisitaq aallaqqittassaaq, isumaqatigiissummi allassimavoq.
Ukioq kingulleq Sermersooq Business Councilip suliffeqarfiit 191-it akornanni misissuititsinerata ilaatigut takutippaa suliffeqarfiit aporfigisartagaasa annerpaat ilaat tassaasoq suliamut piginnaasalinnik sulisoqarnissaq.
Malittarisassanik sukaterinissamik Siumup, Partii Naleqqap, Atassutip Nunatta Qitornaasalu naalakkersuisoqatigiinnissamik isumaqatigiissutiminni neriorsuutaat aana:
