Sulisitsisut: Ilaasortatta sulisut 900-t sinnerlugit amigaatigaat
Nunatsinni suliffeqarfiit septembarip qaammataani 977-init ikinnerunngitsunik sulisussaaleqipput, Sulisitsisullu naapertorlugit sulisussaaleqineq aaqqiissuteqarfigineqanngippat tamanna kinguneqangaatsiarsinnaavoq.
- Suliassanik isumaginnittussanik amigaateqarneq pissutigalugu suliassat piffissaq eqqorlugu naammassineqannginnerat suliassalluunniit iserfigisinnaannginnerat unammillernarsinnaavoq, GE-p allattoqarfiani pisortaq, Karsten Lyberth-Klausen, KNR-imut oqarpoq.
Suliffeqarfiit Sulisitsisunut ilaasortat 306-it, sulisunik ilinniarsimasunik ilinniarsimanngitsunillu atorfinitsitsiniarneq qanoq ajornakusoortitsigineraat, HS Analysep apeqqutigaa.
AAMMA ATUARUK Sulisussaaleqineq siuariartornermut akornutaasoq
Ineriartorneq kigaallassissagaa
Misissuinermi suliffeqarfiit affaat sinnerlugit akissuteqarput, taamaalilluni ilinniarsimasut 713-it iinniarsimanngitsullu 264-it suliffeqarfinnit amigaatigineqartut paasineqarpoq.
Taamaammat nunatsinni suliffeqarfiit pisariaqartunik sulisussarsisinnaanngippata tamanna nunatsinni inuussutissarsiornermut kigaallaqutaanissaa, GE-p ernumanartoqartippaa.
- Inuiaqatigiinni aningaasatigut nammineq napatitsinermik ingerlatsisussat tassaapput inuussutissarsiortut namminersortut, tamatumanili naammattunik sulisussarsinngikkunik tamanna kigaallaquserneqarsinnaasoq oqaatigineqarsinnaavoq, Karsten Lyberth-Klausen.
AAMMA ATUARUK Avataanit suliartortunut inatsit sukaterneqassaaq
Avataaniit sulisussarsinissaq ajornaannerussasoq
Misissuineq naapertorlugu aalisakkerinermi, inuussutissanik tunisassiornermi, neriniartarfinni takornariaqarnermilu sanaartornermilu pingaartumik sulisussaaleqisoqarpoq.
Taamaammat sulisussaaleqisoqarunnaarsitsisoqassappat nunatta avataaniit tikisitsinissap ajornaannerunissaa Sulisitsisut kissaatigaat.
- Suliffissaaleqisut taama appasitsiginikuunngisaannarput, taamaammat avataaniit sulisussarsiornissap ajornaannerunissaa pisariaqartipparput, Sulisitsisut allattoqarfianni pisortaq, Karsten Lyberth-Klausen oqarpoq.