Aningaasaqarnermut Siunnersuisoqatigiit: Sulisussaaleqineq siuariartornermut akornutaasoq
Aningaasaqarnermut Siunnersuisoqatigiit 2018-imut nalunaarusiaanni taama ilaatigut inerniliisoqarpoq, sulisussaaleqisoqarneranut pissutaasinnaasut aassigiinngitsut pingasut tassani taakkartorneqarlutik.
Suliffissaaleqisut amerlasuut ilinniaqarsimanngillat, amerlasuut illoqarfimmut allamut nuullutik suliartorusunngillat, sulinerullu imminut akilersinnaassusia appasippallaarluni.
Kalaallit Nunaanni suliffissaqartitsiniarnermi pissutsit assigiinngitsut imminnut assortuuttut siumugassaasut, Aningaasaqarnermut Siunnersuisoqatigiit nalunaarusiami allaaseraat. Suliffissaaleqisut amerlasuut sulisinnaasuseqarput, sumiiffinnili amerlasuuni suliffissaaleqisoqarluni.
AAMMA ATUARUK Kuannersuit suliffippassuarnik pilersitsiffiunissaat Berthelsenip neriuutigaa
Sumiiffiit suliffissaaleqiffiunerpaat sumiiffinnut sulisussaaleqisoqarfiusunut aamma assigiinngissuteqarput. Aningaasaqarnermullu Siunnersuisoqatigiit nalunaarusiaat naapertorlugu inuit suliffissaaleqiffiusunit sulisussanik amigaateqartoqarfinnut ilaatigut nuukkusunneq ajorput.
Akissaatikinnerusullu akornanni sulinermi iluanaarut annertuallaanngitsoq, Siunnersuisoqatigiit oqaatigaat. Pisortat ikiorsiisarnerat, soorlu ineqarnermut tapisiat, meeraqarnermulluunniit tapisiat, sulinermut naleqqiullugit qanoq pissarsiaqaataaffiutiginersut, Aningaasaqarnermut Siunnersuisoqatigiit naatsorsorsimavaat.
AAMMA ATUARUK Nunatsinni suliffeqarfiit kandidatitut ilinniarsimasunut Danmarkimi pilerisaarilersut
Kisermaaq marlunnik meeralik, pisortanit assigiinngitsutigut ikiorserneqartartoq, ukiumut ikinnerpaamik 93.000 koruuninik isertitaqartariaqassaaq, aningaasat nammineq atorsinnaasai amerleriaateqassappata. Tassa imaappoq, suliffiit sivikitsumik suliffiusut, suliffiilluunniit akissarsiakiffiusut annerusumik iluanaarutaaneq ajorput.
Pisortat ikiorsiissutaasa aaqqissuuteqqinneqarnissaat, Aningaasaqarnermut Siunnersuisoqatigiit nalunaarusiaminnni innersuussutigaat, ikiorsiissuteqarsinnaanermut piumasaqaatit naleqquttuuneersut aamma misissuiffigeqqullugit.