Kuannersuit suliffippassuarnik pilersitsiffiunissaat Berthelsenip neriuutigaa
Suliniutip aallartisarneqarnerata nalaani sulisut 1171-iunissaat Kuannersuarni piiaaviliornissaq pillugu VVM-imik nalunaarusiami missiliorneqarpoq. Taakkunanngalu 200-t missaat nunatsinneersunik inuttalerneqassapput.
Piiaanerlu aallartippat sulisorineqartut 715-it missaanniissaapput, taakkunannga atorfiit 328-t nunatsinneersunik inuttalerneqarnissaat naatsorsuutigineqarluni.
Taakkuli naammanngillat, SIK-p siulittaasua Jess G. Berthelsen taama oqarpoq.
- Kisitsisit taakku ilaatigut ilisaraakka, kisianni isumaqarpunga soorlu 200-ninngaanniit 400-nut qaffaasoqarsinnaasoq, taavalu ingerlanerani aamma marloriaatinngorlugit.
Taanna naapertorlugu sulisussanik avataanit tikisitsisarneq iluaqutaanngisaannarpoq.
Jess G. Berthelsenip oqaatigaa sulisussanik tikisitsinissaq ukiut qulit matuma siorna akerleralugu suaartaatigisimassagaluarlugu, maannali suliaqarfiit ilaanni sulissanik amigaateqarneq nassuerutigisariaqaripput.
SIK-p siulittaasua isumaqarpoq nunatsinni suliniutit ukiut ikitsuinnaat iluanni aallartisarneqartussatut pilersaarutigineqartut taama amerlatiginerat isumatusaarnerunngitsoq.
Suliniutut gama amerlatigisut ukiualunnguit ingerlaneranni aallartisarniarneqarmata, tamanna assissaqanngitsumik imminut assortuuttortaqartoq, aningaasarsialittut inuussutissarsiortut siulittaasuat isumaqarpoq.
AAMMA ATUARUK ICC Kuannersuarni piiaavissaq pillugu nalunaarusiamik saqqummersitsissaaq
Sulisussaaleqisullu ukiuni kingullerni sisamani ikiliartuinnaraluartut, suliaqarfiit ilaanni suli unittooqqasoqarlunilu inuussutissarsiutitigut ineriartortitsisoqannginnera Jess G. Berthelsenip erseqqissaatigaa.
- Kisianni aamma puigunngisaannassavarput sumiiffiit ilaanni suliffissaaleqineq annertoqaaq, allaat Kuummiuni suliffissaaleqineq 40 procentiulluni.
VVM-imillu nalunaarusiap tunniunneqarnerata nalunaarutigineqarnera arlaatigullu pisoqartariaqarnerata politikerit akornanni isumaqatigiissutigineqarnera SIK-p siulittaasuata isumalluarnartippaa.
- Kialuunniit politikerip nalunngilaa Kujataani ukiorpassuarni susoqarsimanngitsoq, suliffinnik nutaanik pilersitsisoqarsimanngilaq. Kujataa inuerukkiartorpoq, nutserarput Avannaanut. Taamaattumik aalajangertoqartinnagu equngasumik nunarput ingerlajuassaaq, kisianni pingaaruteqarpoq suliffissaaleqiffiusuni immaqa soorlu Namminersorlutik Oqartussat suliffeqarfiutaasa ilaat nuunneqarsinnaanerat, taamaalilluni suliffissaaleqineq aamma akiorneqassammat.
AAMMA ATUARUK Avatangiisit pillugit aarleqquteqarneq VVM-imik nalunaarusiami akerlilerneqartoq
