Siunnersuisoqatigiissat peqqissaasut siunnersussavaat

Atorfitsigoortumik nipangiussisussaatitaaneq qaqugukkut unioqqutinneqarsinnaava? Toqorusuttunik qaqugukkut ikiuisoqarsinnaava? Apeqqutit ilaatigut taamaattut nunatsinni peqqissaanermi ileqqorissaarnermut siunnersuisoqatigiinni pilersinniarneqartumi oqallisigineqartassapput.

Peqqissaanermi ileqqorissaarnermut siunnersuisoqatigiit pilersinniarneqartut tassaapput peqqissaanermi suliaqartut ulluinnarni naapittakkatik akunnattoorfigisinnaasatik ileqqorissaarnissami unammillerfiusut pillugit siunnersiorfigisinnaasassaat.

AAMMA ATUARUK Sygeplejerske vil have særligt etisk råd

- Imaappoq, ilinniagaq peqqissaaneq assigiinngitsutigut ilinniaqatigiissimasut akornanni apeqqusersorneqarsinnaagami. Isornartorsiuinngikkaluarluni, kisianni suliaq assigiinngitsutigut aamma suliarineqarsinnaanera oqaloqatigiissutigineqarsinnaagami, ileqqorissaarneq puigornagu, qitiusumik immikkoortortami peqqissaasut pisortaat Inuuti Fleischer oqarpoq.

Inuuti Fleischerip Peqqissaasut Kattuffianni siulittaasuunermini siunnersuisoqatigiinnik pilersitsinissaq ukiut sisamat matuma siorna sulissutigilerpaa.

Nalornissutaasinnaasut amerliartortut

Danmarkimi peqqissaanermi ileqqorissaarnermut siunnersuisoqatigiinnik 1990-imi pilersitsisoqartoq, Norgemi 1981-imili pilersitsisoqarpoq.

Inuuti Fleischer naapertorlugu napparsimmaveqarfimmi suliassat assigiinngissitaartut amerliartormata apeqqutit ileqqorissaarnermut tunngasut aamma amerliartorput.

Peqqissaasut ulluinnarni sulinerminni assigiinngissitaartunik ileqqorissaarnissamut tunngassuteqartunik unammilligassaqartarput. Suliallu nalorninartorsiorfigisinnaasat isumaliutersornartut siunnersuisoqatigiinnut saqqummiunneqartassapput.

AAMMA ATUARUK Peqqissaasut siulittaasortaarput

- Imaappoq, suliatta iluanni suliatsinnulluunniit attuumassuteqartut nalorninartorsiorfigisinnaasagut pillugit oqaasinnguisinnaaneq.

Suleqatigiissitaliaq siunnersuisoqatigiinnik pilersitsinissamik suliaqartoq arfineq-marlunnik inuttaqarpoq.

Peqqissaasut peqqinnissaqarfimmi immikkoortortani assigiinngitsuni sulisut, ilinniarfimmi ilinniartitsisoq ilinniartorlu suleqatigiititami ilaasortaapput. Taakkulu suleriaasissanik maanna ilusilersuileruttorput.

Siammasissumik siunnersuisinnaasut

Siunnersuisoqatigiit toqqarneqartut peqqissaasuussapput misilittagallit assigiinngiiaanillu suliaqartarnermikkut peqqissaasunut ilinniartunullu siammasissumik siunnersuisinnaassallutik.

- Naatsorsuutigaarput siunnersuisoqatigiinni tallimat arfinillillu akornanni ilaasortaqassasoq taavalu sapinngisamik peqqissaanerup iluani assigiinngitsutigut suliaqartut peqataatinneqarnissaat.

Siunnersuisoqatigiilli peqqissaasoqatiminuinnaq siunnersuisassapput, tassalu pisortanut allanulluunnit attumassuteqassanatik.

AAMMA ATUARUK PK: Naalakkersuisut anguniagaat piukkoorpallaarput

- Aalajangiisinnaassuseqassanngilagut, siunnersuisoqatigiiginnaassuugut. Erseqqissaassutigissavara Peqqissaasut Kattuffiata ataanniissagatta. Imaappoq, Peqqissaasut Kattuffiat akisussaaffigissavarput, kisianni namminneq isummersorsinnaatitaassuugut, qitiusumik immikkoortortami peqqissaasut pisortaat Inuuti Fleischer oqarpoq.

Peqqissaasut Kattuffiat novembarimi ataatsimeersuassaaq, tassanilu ileqqorissaarnissamut siunnersuisoqatigiissanit maleruagassiat akuersissutigineqassapput, ataatsimeersuartullu akuersippata siunnersuisoqatigiit atuutilissapput.