Qulimiguulimmik timmisartuussinerit tallimararterutaat unitsinneqartarput
945-it.
Air Greenlandip timmisartuussinissaralui taama amerlatigisut, teknikikkut ajutooqqaneq peqqutigalugu unitsiinnarneqartarput.
Attaveqaasersuutinut naalakkersuisuusimasup, Erik Jensenip siornatigut oqaatigivaa aaqqiissuteqartoqartariaqartoq:
- Sila iliuuseqarfigisinnaanngilarput, kisianni teknikkikkut pissuteqarnerit sapinngisamik annikillisarneqassapput, Erik Jensen 2022-mi Air Greenlandimik ataatsimeeqateqarnermini, ajornartorsiut taanna immikkut ittoq aaqqiissuteqarfigiumallugu.
Qangali ajornartorsiutaasartoq
Manna tikillugu tamanna aaqqiivigineqarsimanngilaq.
Qulimiguulinnik timmisartuussinissamik unittitsineq, atortunik peqqumaatinik amigaateqarnermik pissuteqarnerusartoq, Air Greenlandimiit siusinnerusukkut oqaatigineqartarsimavoq.
Borgmester Palle Jeremiasseni ukiup aallartinnerani timmisartuussinerit pittaanerulernissaannik Air Greenlandimut piumasaqaqqippoq:
- Paasisinnaavarput silap ajornera pissutigalugu unittitsisoqartartoq, kisianni teknikkikkut ajornartorsiutit amerlavallaarput, tamannalu inuppassuarnut timmisartukkut ukiaanerani angalasussanut eqquisarpoq, taanna allappoq.
- Namminersornerullutik Oqartussat aamma Air Greenlandi kiffartuussinissamut isumaqatigiissuteqarput, tassa imaappoq angalasut pingaarnerutillugillu kiffartuussisussaatitaasut.
2021-mi qulimiguullit taarsernerisanit ajornartorsiut peqqutaaqataasoq Air Greenlandip KNR-imut allakkatigut akissummini allappaa.
- Qulimiguullit atorlugit angallassineq imaaliallaannarluni atulersinneqarsinnaanngilaq, isumannaallisaaniarnermummi piumasaqaatit sukannersorujussuupput. Tamanna pillugu teknikkikkut ajornartoortoqarnera iternga tikillugu misissorneqartartussaavoq.
- Tamanna ilaatigut ajornarneq ajorpoq, ilaatigullu kingoraartissanik taarsiisoqartariaqartarluni. Kingoraartissanik atortussiortup pilersuinera Covid 19-ip tuniluutileruttornerata kingunerisaanik kigaannerulerpoq, Air Greenland erseqqissaavoq, pitsaanerusumillu sullissinissani sulissutigigaa nalunaarutigalugu.
Aammattaaq ilannguppaa teknikerit qulimiguullit ajornartorsiutaannik aaqqiiniartarneri piffissap ingerlanerani sukkatsikkiartortut.
Timiisartuussinissat tallimararterutaat taamaatiinnarneqartut
Kisitsisit Ineqarnermut Attaveqaasersuutinullu Naalakkersuisoqarfimmeersut, tassaapput qanoq ajortigisumik inisisimasoqarneranut Air Greenlandimut takussutissat.
Qulimiguuliit H155-it 2021-miit atorneqalernerisa kingorna, teknikkikkut ajornartooqqaneq pissutigalugu unitsinneqarnerit kisitsisini agguaqatigiissillugit amerlassusaat naatsorsorneqarput.
Kisitsisit taakku timmisartuussinernut 3.977-inut naammassineqarsimasunut sanilliunneqartariaqarpoq. Tassa imaappoq timmisartuussinissani pilersaarutaasunit 19 procentii qulimiguulinnik timmisartuussinngitsoortoqarpoq.
Anders Olsen siumumeersoq naalakkersuisumut Hans Peter Poulsenimut teknikkikkut ajornartorsiutit qanoq amerlatigisunik qulimiguulinnik timmisartuussisoqannginnerannut pissutaasimanerat pillugu apeqqutiginnittuuvoq.
