Avannaa Arctic Gamesimut piareersaleruttortut
Naak issittormiut naapillutik februaarimi aatsaat unammisaqattaartussaagaluartut, Avannaa Arctic Gamesimut piareersaateqartoqalereerpoq.
Alaskamit, Nunavumit Nunavimmiillu peqataasussat kommunip nunatsinnut qaaqqulersaarpai.
Issittormiullu timersortartut tamaneersut ataatsimoortinnissaat pingaaruteqaqisoq, borgmesteri Palle Jeremiassen oqaluttuarpoq.
- Piorsarsimassuserput aamma oqaluttuarisaanerput immikkuullarissoq pillugit nunanik allanik ataatsimooqatigisinnaasatsinnik ujartuisarnerput uagutsinnut pissusissamisoorpoq. Aamma pingaaruteqarpoq najukkami innuttaasunut takornarianullu sammisassaqartitsinernik nutaanik ineriartortitsinissarput, taanna oqarpoq.
Kommuni soqutiginarsaraat
Unammissutaasussat aqqaneq-marluk saniatigut nunanit allanit oqaluttuartitsisoqassaaq allanillu kulturimut tunngasunik ilanngussaqatitsisoqassalluni.
Taamaaliornikkut Issittumi kulturi immikkuullarissoq oqaluttuarisaanerlu sammineqarniarput.
Issittormiulli unammiuaartinneqarnissaat Avannaata Kommuniata allamik aamma siunertaqarfigaa.
Avannaa Arctic Gamesimi inunnik kommunimut kajungilersitsiniaalluni suliniuterpassuit ilagiinnarpaat. Avannaata Kommuniani najugaqarnissamut, sulinissamut aamma takornariarnissamut soqutiginarsaataassasoq, borgmesteri oqaluttuarpoq:
- Sammisaqartitsinerit assigiinngitsut takornarianut najukkamilu innuttaasunut soqutiginarsinnaasut aamma naapertuussinnaasut aqqutigalugit takornariaqartarnermut piffissap sivitsornissaanut anguniagaraarput, Palle Jerimiassen oqarpoq.
Avannaata Kommuniata Arctic Sport Greenland suleqatigalugu unamminerit assigiinngitsut pilersaarusiorpaat, taakkulu Arctic Sports kiisalu Denne Games akulerullugit ingerlanneqassallutik.
Avannaata Kommunia nunanit ataasiakkaanit aallartitat katillugit 23-t qaaqqussavai.