Pan-Arctic Visionip kingorna: Nuannaarpunga, nuannaartorujussuuvunga

- Aaqqissuussaq misigalugu tupinnaqaaq. Inuillu tusarnaariat nuannisarpaseqaat. qisuariaataallu nuanneqaat. Ersaartaattut, nuannattut, isumaqarpunga nipilersortartut tamarmik pikkorilluinnartut.

Aalajangiisartoq, Pan-Arctic Visionimi aaqqissuisoq, Amund Sjølie Sveen oqarpoq.

Nuummi Katuami Issittumi Eurovisionimut assingusumik arfininngormat aaqqissuussisoqarpoq – aaqqissuussilerlu pitsaalluinnartoq, Amund Sjølie Sveen aaqqissuussinermi Nina Sikkersoq Kristoffersen peqatigalugu ingerlatsisuusoq isumaqarpoq.

- Tusarnaariat nipilersortartullu akornanni naapinneq nuannarilluinnarpara. Maanna nuannaartorujussuuvunga. Nuannaangaatsiarpunga, taanna oqarpoq.

Nipilersuutit pingasut aaqqissuussinermi ajugaatinneqarput: Canadami Nunavummit torlorsorneq, Ruslandip issortaanit nipilersuut aamma Norgep avannaanit nipilersuut.

Pan-Arctic Visionili ajugaasoqarnissaanut tunnganerpaanngitsoq, aaqqissuisut oqaatigaat. Nipilersornermimmi nuannanneq Eurovisionimut attuumassuteqanngilaq – eqqumiitsuliornermili suliniutaanerulluni, tassa issittumi nunat nunallu immikkoortui ataatsimut nuannisaqatigiillutillu nipilersoqatigiinnerat.

Issittumi inuit – inoqqaajusut inoqqaajunngitsullu – erinarsoqatigiillutik issittumi ataatsimoortinnissaat anguniagaavoq.

Pan-Arctic Vision Norgemi Vadsømi siullerpaamik siorna aaqqissuunneqarpoq, kalaallillu nipilersortartut NUIJA issittormiorpalaarnerpaatut ajugaapput. Nunarput ukioq manna aaqqissuussinissamut aamma ajugaavoq, taamaammat Pan-Arctic Visionip aappassaanik aaqqissuunneqarnera nunatsinni aaqqissuunneqarluni.

Nunavummit Iva aamma Angu torlorsorlutik arfininngormat ajugaapput, taamaammat Pan-Arctic Vision aappaagut Nunavummi aaqqissuunneqassaaq.

- Suliassaqassaqaaq, takussavarpullu tasamani piviusunngortissinnaassanerlutigu. Nunavut ilisimasaqarfigivallaanngilara tasamaniinnikuunngisaannarpunga. Taamaammat suliassaqarnassaqaaq iliuuseqarfigissavarpullu, Amund Sjølie Sveen qulakkeeraluni oqarpoq.

Suliniaqatigiiffeeraq aaqqissuussisuusoq Issittumi nipilersornermik aaqqissuussinissamut suleqateqarnissamik pisariaqartitsilluinnartuuvoq.

Naak aappaagu peqataanissamut aningaasassaqarnissaq eqqarsaatigineqalereeraluartoq arfininngormat aaqqissuussisoqarnera suli nuannaarutigineqarluarpoq:

- Kalaallit Nunaata inui pitsaanerpaapput. Issittormiut assigiinngitsut takullugit alutornarpoq. Uanga nammineq Norgep avannaaneerpunga, pinngortitaq Kalaallit Nunaanni pinngortitaq assigeqaa. Uanga suminngaanneerfinni aamma orpeqanngilaq, kisianni qaqqat allaanerungaatsiarput.

- Kalaallit Nunaanni nipilersornerup qanoq pingaaruteqartiginera nuannerpoq. Amerlasuut nipilersoqatigiinniittarput, Amund Sjølie Sveen Nuummut tikeraareerluni oqarpoq.