Assit takukkit: Arctic Winter Games aallartittoq
Arctic Winter Games ippassaq unnukkut ammaanersiorpoq.
Alaska naggueqatigiit Dena’inat aamma Ahtna Denet siuaaqarfigisaanni Mat-Sumi AWG-mi ukioq manna unamminermi aaqqissuussisuuvoq. Arfininngorneq marsip 16-iata tungaanut unammisoqassaaq.
Nunarput 48-nik peqataatitaqarpoq, taakkulu tamarmik AWG-mi atisartaatik nutaat atorlugit ammaanersiornermi peqataapput.
Nunatta peqataanerata saniatigut Issittumi sumiiffimminnit arfineq-marlunnit aamma Alaskamukartunik peqataasoqarpoq. Taakkulu erfalasulisarlutik ukioq manna unamminernik aallartinnissaminnut piareersimapput.
Team Greenland amerlanerusunik peqataasoqartussaagaluarpoq, kisianni volleyboldertartut, sulorartartut arnallu futsalimik unammisartut timmisartup akii pissutigalugit taamaatiinnarput.
Nunatsinnit Inuit Pinnguaataannit, sulorarnermit, ujakkaarnermit, Eqqillit Pinnguaataannit aamma snowboardernermit ukioq manna peqataasoqarpoq.
Nunatsinnit unammiartortunit ullumi unammeqqartoqassaaq, timersuutinilu assigiinngitsuni tallimani unammisoqassalluni. Ilaatigut niviarsiaqqat Inuit Pinnguaataannik unammisartut isikkanik-marlunnik qummut isimmeriaanermik unammissapput.
Arctic Winter Games nalinginnaasumik ukiut marlukkaarlugit aaqqissuunneqartaraluarpoq, 2020-mi 2022-milu unamminissat Covid-19 pissutigalugu taamaatiinnarneqarnikuummata siorna ukioq mannalu aaqqissuunneqarpoq.
