Ukiaanerani ataatsimiinneq: Naalakkersuisoq aappassaa tatigineqarunnaartoq

Atassutip ineqarnermut attaveqaasersuutinullu naalakkersuisoq, Hans  Peter Poulsen (S), ippassaq tatigiunnaarlugu taasititsinissamik siunnersuuteqarpoq. Naalakkersuisoq pineqartoq Naleqqap aamma ullumi pingasunngornermi tatigiunnaaramiuk taasititsinissamik siunnersuuteqarpoq.

Ineqarnermut aaqqissuusseqqinneq Hans Peter Poulsenip siuttuuffigisaa partiit illuatungiliuttut marluullutik tatiginnikkunnaarnerminnut tunngavilersuutigaat.  

Naleraq tatiginnikkuunnaarnermini aamma ima allappoq: ´Taamatuttaaq Ineqarnermut Attaveqaasersuutinullu Naalakkersuisoq Hans Peter Poulsen, assinganik, siunnersuut akuerineqassatillugu, ineqarnermut innuttaasunut atuisunut siunissamut ineqarnermut akiliutaalersussat kingunissaalu tamakkiisumik saqqummiunneqarnikuunngillat.´

Isornartorsiut

Hans Peter Poulsen ineqarnermut aaqqissuusseqqinneq pillugu inatsisissatut siunnersuuteqarnermi paasissutissanik nipangiusimasaqarsimasoq Naleraq Atassutitulli isumaqarpoq.

- Taamaasilluni Ineqarnermut Attaveqaasersuutinullu Naalakkersuisoq Hans Peter Poulsen, Inatsisartut oqaluuserisassamik oqaluuserinninneranni paasissutissap oqaluuserisap inatsisartunit aalajangiiffigineqarnisaaanut annertuumik pingaaruteqartunik nipangiussisimavoq.

- Qulaani pineqartoq tunuliaqutaralugu siunnersuuteqartariaqarpugut ullormut oqaluuserisassani ikaarsaariarnermut tulliuttumut, Ineqarnermut Attaveqaasersuutinullu Naalakkersuisoq peqquteqartumik tatiginnikkunnaarnermik takutitsilluta saqqummiussivugut, Naleraq tatiginnikkuunnaarnerminut taama tunngavilersuivoq.

Hans Peter Poulsenili naalakkersuisoqatigiinnit, tassa Siumumit aamma IA-mit, taperserneqarpoq.

- Inatsisartuni amerlanerussuteqartut, Ineqarnermut Attaveqaasersuutinullu Naalakkersuisup tatiginassusaanik apeqqusiinngillat.

- Naalakkersuisoqatigiit siullermik erseqqissarusuppaat, tatiginninnginnermut taasisoqarnissaanik siunnersuut immikkoortumut oqaluuserineqartumut tunngassuteqanngimmat, Siumut Naleqqamut akissummini taama allappoq.

Ataatsimiinnerlu pilersaarutareersut malillugit ingerlaqqippoq.