Ineqarneq Inatsisartuni oqallisigigaat: Atassutip naalakkersuisoq uppiseriaraluaraa

Pisortat inissiaataat attartortittakkat inissiatut nammineq pigisatut allanngortinnissaannut Naalakkersuisut imaluunniit kommunalbestyrelsip, nammineq suliniuteqarnikkut, aalajangiisinnaanngortillugit, nutaamik malittarisassaliortoqarnissaanik Naalakkersuisut siunnersuutaat Inatsisartut marlunngornermi ualikkut suliaraat.

Siunnersuut tapersersorneqarluarpoq, partiit Naalakkersuisoqatigiittut Inuit Ataqatigiit Siumullu taava aamma Demokraatit akuersaartumik nipeqarmata.

Demokraaatilli siunnersuut piviusunngortinneqarpat, inissiat niuffatigineqarsinnaasut amerlisussaammata, maannakkut nammineq pigisamik angerlarsimaffeqareertunut pitsaanngitsumik sunniuteqarsinnaanera misissoqquaat.

Atassut: Naammattumik nassuiaasoqanngilaq  

Pisortalli inissiaaterpassuinik aserfallattunik iluarsaanikkut aningaasaqarnikkut artukkiutaasussat qanoq amerlatigiumaarneri tamanut naaammattumik erseqqissumik nassuiarneqanngitsoq, Atassut isumaqarpoq.

- Kinguaattoorutit 3,8 milliard koruunit missaaniipput. Tamanna Naalakkersuisuniit oqaatigineqanngilaq, Atassummiit tatiginnikkunnaarnermik taasisitsinissamik siunnersuuteqaramik oqarput.

Partiip aamma oqaatigaa, ukiuni 15-ini aningaasalersuutissatut pisariaqartinneqartut 5 milliard koruunit missaaniillutik, ukiunilu 20-ini pisariaqartinneqartut 6,3 milliard koruuninut qaffassallutik.

- Tamakkua tamanut erseqqissumik nassuiarneqanngillat. Kommuninut aningaasatigut artukkiisinnaasorujussuusinnaasoq ernumanartorujussuusorlu nalilerparput.

Partiili Inatsisartuni amerlanerussuteqartunik taaseqatissarsinngilaq.

Inuit Ataqatigiit aamma Siumut naalakkersuisunut ilaasortamut suli tatiginnippoq.

- Ineqarnermut Attaveqaasersuutinullu Naalakkersuisoq, Namminersorlutik Oqartussat inissiaataasa ukiuni aggersuni iluarsartuunneqarnissaanut suliaqarnermini, akissaattut kisitsisit maannamut naatsorsorneqarsimasut saqqummiussai Naalakkersuisoqatigiit apeqqusinngilaat, taamaammallu amerlanerussuteqartut siunnersuutigissavaat oqallinneq ingerlaqqissasoq, Naalakkersuisut partiivi allapput.

Ataatsimeeqataasunit 23-iusunit 166-it tamatumunna taasipput. Atassut Nalerarlu akerliupput. Demokratit taasinngillat.