Mingutsitsinnginerusunik nukissiuutiliortoqaraluaqisoq mingutsitsisoqarnerujartuinnartoq
Ataavartunik nukissiorfiit siorna aatsaat taama sanaartorneqartigipput, nukissioriaatsit mingutsitsinermik annikinnerpaaffilikkat aamma grøn energimik taaguuteqartut billion dollarinik aningaasaliiffigineqartarnerisa ingerlaartuarnissai naatsorsuutigineqarpoq.
Taamaattorli suli nunap iluani sinnikunit tassa uuliat, aamarsuit kiisalu gassimik nukissiarineqartartut atugaanerpaapput.
Taamaasilluni nunarsuarmi inuttusiartuinnartumi atuinerullu annertusiartornerata malitsigisaanik CO2-mik aniasitsineq siorna aatsaat taama annertugigaaq.
Nunarsuarmut tamarmut nukissiornikkut atuinerup Det Internationale Energiagenturineersut ukiut tamaasa nalunaarusiaanni World Energy Outlookimi allaqqavoq.
Tunngaviusumik allannguiniarnerup unammillernartoqarnera nalunaarutigineqarpoq.
Nukissiuutit mingutsitsinermik annikinnerpaaffilikkat sanaartorneqaraluaqisut, inuttusiartornerup ilutigisaanik nukissamik pisariaqartitat annertusiartorput, tamannalu mingutsitsisunik soorlu uulianik nukissiornerit allallu mingutsitsinnginnerusunik taarserlugit allannguiniarnerup inorsartippaa.
Kinami seqernup anorillu nukinga nukissiornermi atorluarneqarniaraluartoq, aamarsuarnik nukissiorfiit sanaartorneqarneri uninngitsut takuneqarsinnaavoq.
Nunarsuarmut tamarmut nukissamik pisariaqartitsineq siorna 2%-mik annertusivoq.
66%-ii qaangilaarlugit nukissiorfinnik mingutsitsisunik suli pilersorneqarmata, siorna CO2-mik aniasitsineq aatsaat taama annertutigilerpoq.
Taamatulli ingerlajuartoqarniarunanngilaq.
Det Internationale Energiagenturimeersut uuliat, gassit kiisalu aamarutissanik pisariaqartitsinerup apparnissaa naatsorsuutigaat.
