Islandip præsidentiata inatsisartunut qinersisoqassanersoq aalajangiiffigisussanngoraa

Islandimi inatsisartunut qinersisoqassanersoq, Islandip præsidentiata Halla Tómasdóttirip sapaatit akunnerata massuma ingerlanerani aalajangiiffigissavaa.

Halla Tómasdóttir Islandimi naalakkersuisut tunuarnerisa aqaguanni taama oqarpoq.

Islandimi naalakkersuisoqatigiit partiinit pingasunit ilaasortaaffigineqartut tunuarniuteqarniartut, ministeriunerup Bjarni Benediktssonip tusagassiortunik sapaatiummat katersortitsinermi nalunaarutigaa.

Islandimi inatsisartut soraarsinneqassanersut nutaamillu qinersisoqassanersoq, præsidentip aalajangiiffigisussanngorpaa. Taama aalajangernissaa naatsorsuutigineqarpoq, allatulli aamma iliorsinnaalluni.

Bjarni Benediktssonip saniatigut partiit ilaasa siulittaasuat naalakkersuisoqatigiilioqqusinnaavaa. Benediktsson Selvstændighedspartimi siulittaasuuvoq.

Partiit tamanna pillugu ataatsimeeqatiginiarini taamaalioreerunilu tamat ataatsimut isigalugit taava aalajangerumaarluni, Halla Tómasdóttir ataasinngornermi oqarpoq.

Novembarip ulluisa 30-anni qinersisoqassangatinneqartoq, Sverigemi Norgemilu nutaarsiassaqartitsiviit allapput.

Kingusinnerpaamik aappaagu ukiakkut aatsaat qinersisoqartussaagaluarpoq.

Bjarni Benediktsson Islandimi apriilimili ministeriuneruvoq.

Islandimi naalakkersuisut qinersisoqarnissaanut ataannassasut taassuma oqaatigaa, naalakkersuisutullu sulisinnaanissaat nammineq naatsorsuutigalugu.

Ataannarsinnaanngippata ministeriunertut taava tunuarniarluni naalakkersuisuugallartussanillu pilersitsisoqassasoq, taanna oqarpoq.