Israelimiut Hizbollahkkullu pilersaarutit naapertorlugit sakkuaakkunnaarallartut

Israelimiut Libanonillu sakkutuui pikitsitsisut Hizbollah, nunatta nalunaaqutaa malillugu unnuap qeqqanut sakkuaakkunnaarallarput.

Nunani assigiinngitsuni nutaarsiassaqartitsiviit arlallit taama allapput.

Israelimiut Hizbollahkkullu Libanonimi akersuutilerneranniit ukioq ataaseq qaangiuteqqammertoq sakkuaakkunnaarallarput.

Hamasikkut Israelimiunut siorna oktobarip ulluisa arfineq-aappaani saassussimmatali sorsuuttoqalerpoq.

Sakkuaakkunnaarallarnissamut piffissaliussaq nalleqqissaarlugu akersuuttoqartoq, nutaarsiassaqartitsivik  BBC allappoq. Sakkuaakkunnaarnissamik isumaqatigiissutaasoq nalleqqissaarlugu Libanonimi illoqarfiit pingaarnersaanni Beirutimi sumiiffinni marlunni akersuuttoqarpoq.

Unnuap qeqqata kingornali saassussisoqaqqinngilaq, taamaasilluni sakkuaakkunnaarallarnissamik isumaqatigiissut pilersaarutit naapertorlugit piviusunngorpoq.

Sakkuaakkunnaarallartoqassasoq, USA-p præsidentiata Joe Bidenip marlunngornermi nalunaarutigaa.

Kangia Qiterlermi Gazami suli sorsuuttoqaraluartoq alloriarneq Kangia Qiterlermi eqqisseqatigiinnermik nassataqarsinnaasoq, Biden aamma oqarpoq.