Rumaaniami talerperliunianeersup ministeriuneq qinersinermi qaangeraa

Rumaaniami talerperliunianeersoq Calin Georgescu nunami tassani præsidentimut qinersinermi ilimagineqarpallaarsimanngeriarluni qinersiseqarnerpaatut isikkoqarpoq.

Taasinernik kisitsinerni inerneriugallartut tamanna takutippaa. Nutaarsiassaqartitsivik AFP taama allaaserisaqarpoq.

Rumaaniami ministeriuneq, Europamik pingaartitsisoq taamaasilluni qaangerpaa, qinersinerullu immikkoortuata aappaanut ingerlaqqittussanngorluni.

Ministeriuneq Marcel Ciolacu, socialdemokratinit PSD-meersoq, qinersinermut atatillugu inunnik isumasiuinerni siuaqqalluartutut sapaammi isikkoqaraluarpoq.

Georgescu siuttuulluni 22,59 procentinit taaguunneqartoq, Ciolaculu 19,55 procentinit taaguunneqartoq, taasinerit 98,6 procentiisa kisinneqareerneranni takuneqarsinnaavoq.

Rumaaniami præsidentimut qinersineq immikkoortunut marlunnut avinneqartarpoq, taaguunneqarnerpaat marluk immikkoortup aappaannut ingerlaqqittarlutik.

Qinigassanngortittut arlaat immikkoortumi siullermi 50 procentinit amerlanerusuniilluunniit taaguunneqarsimappat ajugaasutut nalunaarutigineqartarpoq, qinersinerullu immikkoortuisa aappaat pisariaqarnani.

Qinersinerup immikkoortuata aappaa decembarip ulluisa arfineq-pingajuanni pisussatut pilersaarutigineqarpoq.