Benediktsson Islandimi ministeriuninngortoq

Islandimi politikkikkut ilisimaneqarluartoq nunami tassani ministeriuninngoqqippoq.

Bjarni Benediktssonimi, Selvstændighedspartietimeersoq, Islandimi naalakkersuisunut siuttunngussaaq.

Politikeri 54-inik ukiulik tusagassiortunik katersortitsinermi ippassaq nammineq taama nalunaaruteqarpoq.

Islandimi maannamut ministeriunerusoq Katrin Jakobsdottir taassuma taamaasilluni kingoraassavaa. Jakobsdottirip Islandimi præsidentinngorniarnissani pillugu ministeriunertut tunuarnini sapaatit akunnerata siuliani nalunaarutigaa.

Islandimi præsidentimut juunip aallaqqaataani qinersisoqartussaavoq.

Jakobsdottirip præsidentinngorniarluni ministeriunertut tunuarniuteqarnera qaqutigoortuusoq, politikkimut tunngasuni immikkut ilisimasallip professorip Olafur P. Hardarsonip oqaatigaa.

- Tamanna ersarilluinnarpoq, Islandimimi politikkikkut siornatigut taamaaliortoqarsimanngilaq, taanna oqarpoq.

Islandimi præsidentitut atorfik nalliuttorsiorpalaarnerni malunnartitsisoqarneranilu pisuussaffeqarnerusarpoq naak inatsisartuni aalajangigassani naaggaarsinnaatitanermik pisinnaatitaaffeqaraluartoq.

Bjarni Benediktsson, maanna tassa ministeriuninngortussaq, nunanut allanut tunngasunut maannamut inissisimagaluarpoq.

Taanna Islandimi ministeriunertut 2017-imi januaarimit novembarimut issiavoq, aningaasaqarnermullu siornatigut aamma ministeriunikuulluni.

Islandimi ulluni makkunani nalorninartorsiorfiusoq nutaarsiassaqartitsiviup Reutersip allaaseraa.