Biden: Trump-i ajugaaffiginissaanut piukkunnarnerpaavunga
Amerikami præsidenti, Joe Biden, sapaatip akunnera kingulleq Trump-ilu oqallikkamik napparsimasimalluni ABC News-mut oqaluttuarpoq.
- Ajorluinnarpunga, ABC News-mi nutaarsiassalerisumut George Stephanopoulos-mut oqarpoq.
Apersorneqarnera tamakkiisoq unnuaru unnuaqeqqata qeqqa takuneqarsinnaassaaq. Apersorneqarnerata ilaa massakkut takuneqarsinnaalereerpoq.
- Qularinngilara Trump ajugaaffigisinnaallugu. Biden apersorneqarnermi oqarpoq.
Reuters taana allappoq.
Bidenip oqallinnermi pissusaa amerlasuunik isornartorsiorneqarpoq.
USA-mi Novembarimi Præsidentimik qinersilerunik Demokratit partianiit 81-nik ukiulik sassartitassaat piukkunnarnersoq oqallisaalerpoq.
- Oqallinnersi aallarniutigilaartigu, illit ilatillu oqarpusi, unnuk nuanninngitsoq, Stephanopoulos oqarpoq.
- Ilaana, Biden apersorneqarnermini akivoq.
Præsidenti nuanniilliorsimalluni uteqqippaa. Nammineq akisussaasuullunili oqaatigaa.
- Qasuvunga. Imminut naalaannginnera uggoraara, unnuk uannut nuanniippoq, Biden oqarpoq.
Biden Trump-ilu sapaatip akunnera kingulleq oqallittussaallutik, præsidenti angalangaatsiarsimavoq. Ilaatigut Frankrig-mi ulloq D-dag-tut taajuutilik ukiunik 80-nngortorsiornerani peqataavoq.
Præsidenti Camp David-mi sapaatip akunneranik sivisussusilimmik oqallinnissamut piareersarsimasoq, ABC News allappoq.
Biden-ip apersorneqarnermini oqaatigeqqippaa piareersarnerup nalaani napparsimasimalluni.
ABC News-ip Donald Trump-i apersorusussimagaluarpaa, apersorneqarnissanili kissaatigisimanngilaa.
Joe Biden peqqarniissinnaasumik apersorneqarnissani piareersimaffigisimavaa.
Præsidentip piareersarneranut ilisimannittut nutaarsiassaqartitsivimmut AP-mut oqaluttuarput.
Massachusetts-ip demokratit guvernør-iat, Maura Healy, tallimanngormat Joe Biden-i præsidentitut qinigassanngorteqqinnissani eqqarsaatigilluassagaa kaammattuisimavoq.
- Ullut tulleriit Biden kaammattorusuppara, amerikami innuttat pillugit, Donald Trump-i ajugaaffiginissaanut piukkunnarnerpaanersoq eqqarsaatigilluaqqullugu, Healy oqarpoq.
Biden-i Novembarimi qinigassanngorteqqissalluni arlalerialuni naqissusernikuuaa. Tallimanngormat qinersisartunik ataatsimiisitsinermi taama oqaqqippoq.
- Tusareersimassavarsi, sapaatip akunnera kingulleq oqallittoqalaarpoq. Trumpilu oqallinnertik pillugu, Biden-i ataqatigiissaarisinnaasimanngittutut utoqqaavallaartorlu isorineqarnini taamatut oqaasertalerpaa.
