Kongressimi ilaasortap Demokratinersup Biden qineqqusaarunnaaqqugaa

USA-mi demokraatit sinnerlugit kongressimi ilaasortap Lloyd Doggettip amerikami præsidenti Joe Biden USA-mi præsidentimut novemberimi qinersisoqarnissaanut qinigassanngortinnerminit tunuarnissaanik kaammattorpaa.

- Joe Bidennunatsinni pisussaaffiit pingaarnersaanni akisussaaffeqarnera akuersaarpara - inuttut atukkani pinnagu, Donald Trumpili taamaanngilaq, Doggett oqarpoq.

Neriuppunga tunuarnissaminut aalajangerumaartoq naak tamanna annernaraluartoq aalajangerniarnerlu ajornakusooraluartoq. Joe Bidenimut ataqqinnillunga taamaliornissaanik kaammattorpara.

Joe Biden siornatigullu præsidentiusup Donald Trumpip oqallinnerisa kingorna taama kaammaattuuteqarpoq.

Oqallinnermi tassani Bidenip angusai arlalinnit qularnartoqartinneqarpoq.

Oqallinnermi Biden iggiarluttutut nipeqarpoq ittoqertarluni piffissallu ilaani oqaasissani nalulertarlugit.

Oqallinneq siusinnerusukkut oqallinnernut sanilliullugu pitsaavallaanngitsoq præsidentip nassuerutigivaa.

Joe Bidenip Donald Trumpillu oqallinnerat siulleq præsidentimut qinersinissamut oqallinnerit marluusut siullersaaraat.

Pilersaarutit naapertorlugit præsidentimut qinigassanngortittut oqallinnissaat tulleq septemberip ulluisa qulinganni pissaaq.