Ikummatissat Naalagaaffiit Peqatigiit silap pissusia pillugu isumaqatigiissutiminni ilanngukkaat
Ikummatissat Naalagaaffiit Peqatigiit silap pissusia pillugu ataatsimeersuarneranni inaarutaasumik isumaqatigiissusiaanni siullerpaamik ilanngunneqarput, ikummatissalli atorunnaariartornissaannut pisussaaffiliisoqanngilaq.
Naalagaaffiit Peqatigiit silap pissusia pillugu COP28-mik taallugu Dubaimi ataatsimiinneranni sivisuumik isumaqatigiinniartoqareerluni oqaluttuarisaanermi pingaarutilimmik pisoqarpoq.
Ikummatissammi COP-imik taallugu ataatsimeersuarnerup inaarutaasumik isumaqatigiissutaanni ilanngunneqarput.
Ikummatissat isumalluutigiunnaariartorlugit nukissiuutinut ataavartunut nuukkiartuaarnissamut nunat suliniuteqarnissaat inaarutaasumik isumaqatigiissummi kaammattuutaavoq.
CO2-mik 2050-imi aniatitsiunnaavinnissamut siunniussamut tamanna aqqutissiueqataassaaq.
Anguniagassatut siunniussat pillugit immikkoortut allattorsimaffiisa aallartinneranni allassimavoq qanoq pisussaaffiliisoqarnersoq.
Nunat assigiinngitsut ikummatissat isumalluutigiunnaariartornissaannut pisussaaffilerneqarnatik, ikummatissat atorunnaariartornissaannut suliniuteqarnissamut kaammattorneqarput.
